Қырҭтәыла аҧыза-министр Иракли Кобахиӡе Азербаиџьантәи ареспублика ахада Ильҳам Алиев диҧылеит. 

Аиҧылараҿы хшыҩзышьҭра рызун Қырҭтәылеи Азербаиџьантәи ареспубликеи рпартниорреи еиуеиҧшым аусхкқәа рҿы аусеицура арҭбаара аперспективақәеи. 

Иаҵшьны иазгәаҭан ҩ-тәылак рыбжьара ахәаахәҭра-економикатә аимадарақәа рҿиара адинамика бзиеи ари аконтекст аҿы аекономикатә усеицура аиҳабырабжьаратә комиссиа инанагӡо ароли. Ақырҭуа аган ишьақәдырҕәҕәеит хара имгакәа акомиссиа анеҩстәи аилатәара амҩаҧгара ишазыхиоу. 

Ҩ-тәылак рлидерцәа аглобалтәи арегионалтәи агеополитикатә проблемақәа ирылацәажәан, даҽазнык иаҵшьны иазгәарҭеит  арегион иҭышәынтәалоу аҿиаразы аҭынчра иамоу аҵакы ҷыда. 

Иара убас аиҧылараҿы,  Қырҭтәылеи Азербаиџьани еицынарыгӡо,  арегионалтә аҵакы змоу апроектқәеи аимадара арҕәҕәараҿы урҭ инарыгӡо ароли иалацәажәеит. 

Аиҧылара ашьҭахь,  ҩ-тәылак,  аенергетикеи атранспорти аусхкқәа рҿы аиқәшаҳаҭрақәа рпакет рыдыркылеит,  уи иаҵанакуеит: Қырҭтәылеи Азербаиџьани рыбжьара афымцала аиқәыршәареи атранзиттә амҩангареи ахадаратә ҭагылазаашьақәа ирызку  20 шықәсатәи аиҳабырабжьаратә еиқәшаҳаҭра; 

Азербаиџьанынтә агаз аахәареи аҭиреи иазкны  2003 шықәсазы ирыдыркылаз аиқәшаҳаҭра  20 шықәса рыла анагӡара, уи ала иазҧхьагәаҭоуп асоциалтә агазла аиқәыршәара ашәарҭадара агарантиақәа. 

Қырҭтәыла  аган аҟынтә адокумент лнапы аҵалҩит аекономикеи иҭышәынтәалоу аҿиареи рзы аминистр Мариам Қвривишвили,  Азербаиџьантәи аган аҟынтә  – аекономика аминистр Миқаил Џьабарови аенергетика аминистр Фарвиз Шаҳбазови. 

Иара убас,  аганқәа ирыдыркылеит  ҩ-ганктәи акоординациатә хеилак апротокол, уи инақәыршәаны,  Бақәа-Қарҭ-Ҟарс аихамҩатә цыҧҵәаха ҿыц инагӡаны аусура иалагоит. Адокумент рнапы аҵарҩит Қырҭтәыла аекономикеи иҭышәынтәалоу аҿиареи рзы аминистр Мариам Ҟвривишвилии, Азербаиџьан арыцхәтә аҿиареи атранспорти рзы аминистр Рашид Набиеви.  Аганқәа ирыбжьарҵаз аиқәшаҳаҭра инақәыршәаны,   6 шықәсатәи аангылара ашьҭахь,  Қарҭи Бақәеи рыбжьара есымшатәи апассаџьыртә аихамҩатә анеиааира еиҭашьақәгылахоит лаҵара 26 инаркны. 

Адокументқәа рнапаҵаҩра ацеремониаҿы иҟан Қырҭтәыла  аҧыза-министр Иракли Кобахиӡеи Азербаиџьантәи ареспублика ахада Ильҳам Алиеви.