Украина ахыхьчаразы закәантә зин амоуп, – иҳәеит Еврокомиссиа аспикер Питер Стано Курсктәи аобласт аҟны имҩаԥысуа ақәԥарақәа данрыхцәажәоз.

“Еврокомиссиа Урыстәыла агрессиа аҿагылара ауси, атәыла асуверенитети атерриториатә акзаара аиҭашьақәыргылареи рҿы Украина алегитимтә зинқәа рыдгылара нанагӡоит”, – иҳәеит Стано.

Стано иажәақәа рыла, Украина агрессор иҵакырадгьыл аганахьала ахысра амҩаԥгара зингьы амоуп.

Курсктәи аобласт аҟны аҭагылазаашьа ҷыда рылаҳәоуп.

Украина арбџьармчқәа аобласт аҟны хеиланхарҭак ааныркылеит. Аланҵәара зауз адыррақәа рыла, атерриториаҿ иҟоу 400-ҩык украинатәи аибашьцәа. Иҵегьы 2000-ҩык аруаа аҳәаа ааигәара игылоуп.

Нанҳәа 7 рзы украинатәи дронқәа Суджа ақалақь ааигәара ҩынтә ажәылара мҩаԥыргеит.

Урыстәыла ахада Владимир Путин иахьа иҟаиҵаз аҳәамҭала, Курсктәи аобласт ақәлара идуӡӡоу провокациоуп.