«Хара имгакәа,  Украина аиааира ашьҭахь, ҳара Евроеидгыла ҳалалоит, аха, уи адагьы, иахьа импыҵахалоу аҵакырадгьылқәа ирықәынхо ауааҧсыра рҟны аиҿцәажәарақәа рымҩаҧгара ҳалшоит.  Урыстәылатәи ампыҵахалатә ар анцалак, цхинвалтәи азҵаара ӡбахоит  —  ицар зҭаху дцоит, иаанхо даанхоит», — иҩит Қырҭтәыла ҧасатәи ахада Михаил Саакашвили  Facebook аҿы.

Иара иажәақәа рыла, аҧсуаа хымҧада ирыдаргалароуп ақырҭуа-аҧсуа федерациа аҧҵара, Қәҭешь административтә центрс иҟаҵаны.

«Аҧсны иадҳәаланы аҭагылазаашьа иаҳа иуадаҩуп. Уаҟа иаҳа ирацәаны ауаа нхоит, насгьы дара иаҳа иаҳцәыхароуп. Сгәы ишаанаго ала, ҳара хымҧада ирыдаагалароуп  азеиҧш ақырҭуа-аҧсуа ҳәынҭқарра, ақырҭуа-аҧсуа федерациа аҧҵара, Қәҭешь административтә центрс иҟаҵаны. Абри аҳәынҭқарраҿы иҩбоу атәылауаҩра иҟазаауеит, Аҧсны атәылауаҩ автоматла  Қырҭтәыла атәылауаҩра иоуеит. Аха, Қырҭтәыла егьи ахәҭа атәылауаа автоматла Аҧсны атәылауаас изыҟалом. Уи абзоурала, аҧсуаа ассимилиациа ашәарҭара иҭагылом.  Ақырҭуагьы  аҧсуагьы бызшәақәа аҳәынҭқарратә бызшәа астатус рымазаауеит. Қәҭешьтәи апарламент  2 палатак рыла ишьақәгылазаауеит, афедерациа аҩ-субиектк иреиҳаӡоу апалатаҿы еиҟароу ахаҭарнакра рымазаауеит.

Аҧсны ахада еснагь Қырҭтәыла авице-ахадас дыҟазаауеит.  Арбџьармчқәеи, ахазалхырҭеи,  аҳәаатә маҵзуреи ринтеграциазы аиасратә период иҟазароуп. Ҳәарада, афедерациа аҩныҵҟа ауаа рхы иақәиҭны аиҭаҵра рылшароуп. Аҧсуаа уи иақәшаҳаҭхома? — Аҵыхәтәантәи ашықәсқәа лабҿаба аадырҧшит Аҧсны жәларбжьаратәи азхаҵара аиуразы ашанс шамам.  Қырҭтәыла  ирыднагало амодель ала Аҧсны ззин наӡоу афедерациа алахәыласи, Евроеидгыла алахәыласи иҟалар алшоит,  ахатә милаҭтә ҷыдарақәа рыхьчареи рҿиареи агарантиала.  Аиҭакра дуқәа рзы ҳахиазарц азыҳәан, аҭоурыхтә шанс ҳмыӡырц азыҳәан,   абарҭ атемақәа рылацәажәара ҳалагароуп.  Сгәаанагарала, Аҧсни Қырҭтәыла егьи ахәҭеи реидҵара абзоурала,  3-4 шықәса рышьҭаххь Қырҭтәыла иаку амилаҭтә аалыҵ  2-3-нтә иазҳауеит, уи ақырҭуагьы аҧсуагьы аҭаацәара цыҧхьаӡа хырҳагара ду азаанагоит. Атуристцәа рхыҧхьаӡара  20 миллионҩык рҟынӡа азҳауеит. Абаҕәазатә инфраструктура аҿиара ду аиуеит», — иҩит Михаил Саакашвили.