Қырҭтәыла ахада Михаил Ҟавелашвили ЕАР ацҳаражәҳәаҩцәа дырҧылеит.

Атәыла ахада ишазгәеиҭаз ала, иара ацҳаражәҳәаҩцәа Қырҭтәыла рвизит дазыразуп, абри аҩыза авизитқәа аҵакы ду рымоуп.

Аиҧылараҿы ЕАР аҳәаақәа ирҭагӡаны қәҿиарала имҩаҧысуа аусеицуреи ЕАР аусураҿы Қырҭтәыла алахәызаара аҵаки, ари аиҿкаара аусхәаҧштә иаҵанакәа азҵаарақәеи ирылацәажәеит.

Хшыҩзышьҭра ҷыда рызун Қырҭтәыла импыҵахалоу аҵакырадгьылқәа рҿы аҭагылазаашьеи, атәыла аекономикатә потенциали, имҩаҧгоу ареформақәеи.

Қырҭтәыла иаҭааиз аделегациа иалоуп ЕАР аҿы абарҭ аҳәынҭқаррақәа еснагьтәи рхаҭарнакцәа: Тонга, Самоа, Таџьикистан,  Конго, Сент-Китси Невиси, Тимор-Лешти (Мрагыларатә  Тимор), Парагваи, Маврикии Ботсванеи.

Апрезиденттә аханаҿ имҩаҧгаз аиҧылара рхы аладырхәит адәныҟатәи аусқәа рминистр лхаҭыҧуаҩ Лаша Дарсалиеи, ЕАР аҿы Қырҭтәыла еснагьтәи ахаҭарнак Давиҭ Бақраӡеи, атәыла ахада иадминистрациа ахаҭарнакцәеи.