ЕАШ ахада иҟаиҵаз аҳәамҭаҿ иара Қырҭтәыла анапхгара рахь ааԥхьара ҟаиҵеит аусԥшаара иалагарц. Иара убас Евроеидгылаҟны ҳколлегацәа рҟны аконсультациақәа шымҩаԥааго иазгәаҳҭеит, – иҳәеит ЕАШ аҳәынҭдепартамент аспикет Меҭиу Миллер ЕАШ ахада Џьо Баиден иҟаиҵаз аҳәамҭа данахцәажәоз.

Меҭиу Миллер ишазгәеиҭаз ала, Қырҭтәыла ахада лҳәамҭала, алхрақәа реилахәара иазку ашаҳаҭгақәа лымоуп, аха ари азҵаара лара лхала дахцәажәароуп, иашьашәалоу аинформациа аусԥшаара адылгалароуп.

“Иаартны иҳҳәахьеит Қырҭтәыла аиҳабыра рҟны аусеицура аиҭахәаԥшра апроцесс аҿы шыҟоу. Қырҭтәыла аиҳабыра рзы 95 миллион доллар иаҟараз ацхыраара аанаҳкылахьеит, иара убас иаанкылоуп егьырҭ ацхыраарақәа, уажәы аригьы аиҭахәаԥшра апроцесс аҿы иҟоуп”, – иҳәеит ЕАШ аҳәынҭдепартамент ахаҭарнак.

Ацентртә алхратә комиссиа апрокуратура ахь иҟанаҵаз ааԥхьара шьаҭас аҭаны,  Апрокуратура апарламенттә алхрақәа реилахәара аҭҵаара иалагеит. Алхрақәа реилахәара иазкны иҟалҵаз аҳәамҭа иадҳәаланы Қырҭтәыла ахада Саломе Зурабишвили апрокуратурашҟа дааԥхьан.

Ари атема иадҳәаланы Қырҭтәыла ахада Саломе Зурабишвили абрифинг мҩаԥылгеит. Ахада ишылҳәаз ала, “иарбанзаалак инормалу атәылаҿ апрокуратура иара ахала ашаҳаҭгақәа аанарҧшуеит, атәыла ахада иҟынтә ашаҳаҭгақәа иаҳәом”.