Қырҭтәыла аҧыза-министр Иракли Ҕарибашвили Шәамахтәылатәи ареспублика аҧыза-министр Никол Ҧашиниан диҧылеит.

Ишиашо аиҿцәажәарақәа раан, ҩ-тәылак рҧыза-министрцәа, Қырҭтәылеи Шәамахьтәылатәи ареспубликеи рыбжьара аполитикатәи, аекономикатәи, акультуратәи усеицура адинамика иалацәажәеит. Иара убас, аиҧылараҿы иазааҭгылеит адунеи аҿгьы арегионаҿгьы ашәарҭадара аганахьала иҟоу аҭагылазаашьа.

Аиҳабыра рнапхгаҩы ишазгәеиҭаз ала, аҭынчратә агәыларатә инициатива  аҳәаақәа ирҭагӡаны, Қырҭтәыла, ҧасеиҧш уажәгьы,арегионаҿ аҭынчра аҿиара ацхраара иазыхиоуп.

Аҧыза-министрцәа иаҵшьны иазгәарҭеит атәылақәа рыбжьара иҟоу аҭоурыхтәи акультуратәи аимадарақәа. Арегион аҭышәынтәалареи мышхәыбзазареи аиқәыршәара амзызла, Шәамахьтәылеи Қырҭтәылеи рхаҭарнакцәа астратегиатә зҵаарақәа рзы зыҩаӡара ҳараку адиалог алагаразы еиқәшаҳаҭхеит, уи қәҿиарала аусеицуреи, иара убас, арегионаҿ аҭышәынтәалареи аҭынчреи ашьақәыргылареи иацхраауеит.

Хшыҩзышьҭра рызун ахәаахәҭра-економикатә зҵаарақәа.

Аҧыза-министрцәа ишазгәарҭаз ала, атәылақәа рыбжьара аекономикатә усеицураҿы аетап ҿыц алагара иазыхиоуп.

Ишиашо аформатаҿ имҩаҧгаз аиҧылара ашьҭахь, Иракли Ҕарибашвилии Никол Ҧашиниании, ирҭбаау аформатаҿ, атәылақәа русеицура адинамика иалацәажәеит. Излацәажәаз азҵаарақәа иреиуп еиуеиҧшым аусхкқәа рҿы қәҿиарала инагӡо аусеицура ахырхарҭақәа. Иаҵшьны иазгәаҭан атранспорти, ахәаахәҭреи, акультуреи, егьырҭ ахырхарҭақәеи рыла атәылақәа рыбжьара аусеицура адинамика бзиа.

Иара убас, иаҵшьны иазгәаҭан ҩ-тәылак реиҳабырабжьаратә економикатә комиссиа ароль, уи Қырҭтәылеи Шәамахьтәылатәи ареспубликеи рыбжьара аимадарақәа рырҕәҕәаразы акрызҵазкәа платформоуп.

Ирҭбаау аформатаҿ имҩаҧгаз аиҧылараҿы аганқәа рхаҭарнакцәа аекономикатә усеицура ахырхарҭа ҿыцқәа ирылацәажәеит.

Аиҧылара рхы аладырхәит Қырҭтәылеи Шәамахьтәылатәи ареспубликеи реиҳабырақәа рылахәылацәа.