Импыҵакылоу Аахыҵ Уаԥстәыла анапхгаҩы ҳәа изышьҭоу Алан Гаглоев Кремль аҿы Урыстәылатәи Афедерациа апрезидент Владимир Путин диԥылеит. Урыстәылатәи Афедерациа апрезидент ипресс-маӡаныҟәгаҩ Дмитри Песков иҟаиҵаз адыррақәа рыла, аиԥылараҿы Урыстәылеи Аахыҵ Уаԥстәылеи русеицура ҳазҭоу аамҭаԥҵәа, иара убас еиуеиԥшым азҵаарақәа рыла аиҿцаарақәа ирылацәажәеит.

Песков иациҵеит, анапхгаҩцәа маи мзазы ирыбжьарҵаз аиқәшаҳаҭра инамаданы, аизыҟазаашьақәа рыҿиара аперспективақәа ирылацәажәеит ҳәа.

Уи иазгәеиҭеит аганқәа еицырзеиԥшу аекономикатә ҭыԥ аԥҵара шрыцҵахо, насгьы ԥыҭ-ԥыҭла адәныҟатәи ауалқәеи адәныҟатәи аинвестициақәеи рганахьала иаку азнеишьа ашҟа ишцало.

Урыстәылатәи аинформациатә хархәагақәа изларҳәо ала, иара убасгьы азԥхьагәаҭоуп аенергетикеи атранспорттә системақәеи реилаҵара, еицырзеиԥшу акоммуникациақәеи ателекоммуникациақәеи рыҿиара, асоциалтә, аџьатә, акультуратә усхкқәа рҿы аусеицура арҭбаара.

Адокумент ахықәкы хаданы иҟоуп аҳәынҭқарратә хьчареи ашәарҭадареи рзы еиқәыршәоу адәныҟатәи аполитика амҩаԥгареи, асоциал-економикатә ҭагылазаашьақәа реиӷьтәреи, аинфраструктура аҿиареи, акапитал, атауарқәа, амаҵзурақәеи, аџьеи рныҟәара азы аҭагылазаашьақәа раԥҵара.