Азербаиџьан   «Аладатәи агазтә корридор» арҭбааразы апартниорцәа рҟны аконсультациақәа рымҩаҧгара иалагеит , — иҳәеит Азербаиџьан ахада Илҳам Алиев  абырзен-болгариатәи агазтә  интерконнектор аартра инамаданы Болгариа аҳҭнықалақь Софиа  имҩаҧгаз ацеремониаҿы.

«Ҳара   TANAP (атрансанатолиатә агазмҩангага)  16 инаркны  32 миллиард акубометр аҟынӡа арҭбаареи  TAP (атрансадриатикатә агазмҩангага)  10 инаркны  20 миллиард акубометр аҟынӡа арҭбаареи азы ҳпартниорцәа рҟны аконсультациақәа рымҩаҧгара ҳалагеит. Убри ада иацҵаны агаз анагара уадаҩхоит», — иҳәеит  Илҳам Алиев.

2020 шықәса ҧхынҷкәын 31 рзы,  Азербаиџьан, Атрансадриатикатә агазмҩангагала  Европаҟа акоммерциатә газ анагара иалагеит, ари агазмҩангага  Бақәантә, Қырҭтәылеи Ҭырқәтәылеи Бырзентәылеи Албаниеи ирылсны, Италиаҟа инеиуеит.  Ахадаратә аӡатә базоуп ахыҵхырҭа  Шаҳ-Дениз, уи   1,2  триллион кубометр аҭаҵәах амоуп.