Апарламент актәи авице-спикер  Гиа Вольски иҳәамҭала,  иацы атәыла ахада лрезиденциа аҧхьа еизаз ауаа ҧасатәи анапхгара рымшала азарал зауз роуп, ари акциа аӡәы цасҳәа еиҿикааит ҳәа узыҳәом.

«Иацы атәыла ахада лрезиденциа аҧхьа еизаз ауаа ҧасатәи анапхгара рымшала азарал  ду роуит, руацәа гәымбылџьбарала иргәаҟын, ма ишьын. Дара рмали раҳаҭыри рымырхит.  Арҭ ауаа  џьоукы рыдҵала акциа еиҿыркааит ҳәа узыҳәом. Ацәгьауаҩ хада ашьауҕа иқәхра  ма ихақәиҭтәра ашәарҭара аныҟоу гәыҧҩык ауаа реизгара аҭахым. Иацы лара иҟалҵаз аҳәамҭа аҵакы цқьа иузеилкаауам, арҭ ауааи атәылеи ринтересқәа ирышьашәалам аполиткиатә аӡбарак далацәажәазшәа угәы иабар ауеит.  Атәыла ахада абри аҩыза агха ҟалҵап ҳәа сгәы иаанагом, уи схахьы исзаагом, избанзар, усҟан ахәымгаратә пиар-кампаниа ахәымгаратә схема нагӡахоит, Қырҭтәыла ахадагьы уи лхы алалырхәоит», — иҳәеит  Гиа Вольски.

Иацы Орбелианиаа рханаҿ имҩаҧгаз абрифинг аҿы Михаил Саакашвили ашьауҕа ихыхра иадҳәаланы ажурналистцәа илырҭаз азҵааразы  атәыла ахада абас аҭак ҟалҵеит: «Азҵаара хада иадҳәаланы аҭак шәаҳауеит ари аҭак аныҟасҵалак».