G7 атәылақәа Украина ажәылара алҵшәа цәгьа шахылҵуа азы Урыстәыла агәҽанҵара аҭаны, аиҿцәажәарақәа ралагаразы ааҧхьара ҟарҵеит

G7 атәылақәа урыстәыла укаинатә кризис аҭыҧқәҵаразы азеиҧш позициазы еиқәшаҳаҭхеит.

Аинформациа аланарҵәеит агентра  «Реитер».

Ливерпуль  (Британиа ду) имҩаҧысит  G7  иалоу атәылақәа рдәныҟатәи аусқәа рминистрцәа реиҧылара. Аиҧылара алахәылацәа урыстәыла-украинтәи кризис иалацәажәеит.

G7 атәылақәа Украина ажәылара алҵшәа цәгьа шахылҵуа азы Урыстәыла агәҽанҵара аҭаны, аиҿцәажәарақәа ралагаразы ааҧхьара ҟарҵеит.

Reuters адыррақәа рыла, Америка аҳәынҭқарратә департамент ахаҭарнак иаҵшьны иазгәеиҭеит  Урыстәылаҟны аизыҟазаашьақәа рҭыҧқәҵаразы адипломатиатә хархәагақәа шыҟоу,  аха,  Москва уи мап ацәыркыр,  алҵшәа цәгьақәа ҟалар ауеит.

Иахьа Америка аҳәынҭқарратә департамент ишаанацҳаз ала,  Америка аҳәынҭқарратә маӡаныҟәгаҩ ицхырааҩ Карен Донфрид  ҧхынҷкәын  13-15 рзы Урыстәылеи Украинеи дырҭаауеит.