Европарламент 31-ҩык адепутатцәа Евроеидгыла иреиҳаӡлу ахаҭарнак Жозеп Боррель иахь ааԥхьара ҟарҵеит Қырҭтәылазы акандидат статус аанкылареи Евроеидгыла аҟынтә афинансркра аиҭахәаԥшреи илагарц.

Адепутатцәа рышәҟәы асоциалтә каҭаҿы алаирҵәеит Петрас Аустревичус.

“Қырҭтәыла анапхгара адемократиа иашьашәалам рхымҩаԥгашьа, ҷыдала, атәым агентцәа ирызку “аурыс стиль змоу” азакәан адкылараан иаадырԥшыз агрессиа, аҭынч демонстрантцәа рыбжьы архәаҿра, урҭ рганахьала амч ахархәара, аҳәаақәа ирхылҵит. Ари иабзоураны ақырҭуа политикеи ауаажәлареи рҿы абарххареи аполиаризациеи ӷәӷәахеит, ари Қырҭтәыла акандидат статус анашьараан Қырҭтәыла аиҳабыра жәшьаҿак рынагӡара иадҳәаланы аиуз аҭакԥхықәра анамгӡароуп. Евроеидгыла ари аҭакда азааннажьуам.

Иџьбароу апозициа аашәырԥшырц шәара шәахь ааԥхьара ҟаҳҵоит.

Қырҭтәыла анапхгареи апартиа “Ақырҭуа гәахәтәы” аӡбарақәеи Евроеидгыла аканидат статус змоу атәыла ианашьоу аҭакԥхықәрақәа ирҿагылоит. Ари иазыԥхьагәаҭаны, Қырҭтәылазы акандидат статус аанкылатәуп, Евроеидгыла аҟынтә афинансркра аиҭахәаԥшреи илагароуп. 2023 шықәса абҵара 8 рзы Еврокомиссиа иҟанаҵаз арекомендациақәа рынагӡара ахырхарҭала Қырҭтәыла амоу апрогресс ахәшьараҭара зыԥшра ҟамҵакәа ҟаҵатәуп”, – иануп европарламентарцәа еицыҟарҵаз аҳәамҭа аҿы.

Ашәҟәы рнапы аҵарҩит 31-ҩык европарламентарцә, урҭ иреиуп – Виола фон Крамон, Андриус Кубилиус, мариам Леқсман, Раса Иунивичиен, Сандра Клиенте, Михаел Галлери уб.егь.