Европа Ахеилак Апарламенттә Ассамблеиа Амониторингтә комитет ажәахәҟаҵаҩцәа  Қырҭтәыла анапхгара рахь ааҧхьара ҟарҵеит  «Атәым анырра аартызаара иазку» азакәан дырхынҳәырц.

Европа Ахеилак Апарламенттә Ассамблеиа асаит аҿы икьыҧхьу аҳәамҭа ишану ала, Венециатәи акомиссиа «Атәым анырра аартызаара иазку» закәан иадҳәаланы абжьагарақәа анцәырнага ашьҭахь,  Қырҭтәыла азҵаарақәа рзы Амониторингтә комитет ажәахәҟаҵаҩцәа  Клод Керни Едит Естреллеи аиҳабырахь ааҧхьара ҟарҵеит азакәан дырхынҳәырц.

«Ақырҭуа ҳколлегацәа иҳаҳәеит зыӡбахәы ҳәоу азакәан иадҳәаланы аиуристтә азгәаҭарақәа ҟаҳҵарц. Абарҭ аргументқәа раҳҭеит Венециатәи акомиссиа алахәылацәа еицҿакны иҟарҵаз абжьагара асахьала. Убри аҟынтә, ҳара анапхгаратә партиа иабжьаҳгоит  Венециатәи акомиссиа абжьагара ишану еиҧш, атәыла ахада лвето иаҧымхкәа, азакәан дырхынҳәырц», — иазгәарҭеит Европа Ахеилак Апарламенттә Ассамблеиа алахәылацәа.

Аҳәамҭаҿы даҽазнык иазгәаҭоуп Венециатәи акомиссиа абжьагара инақәыршәаны Қырҭтәылаҿ иҳәынҭқарратәым аиҿкаарақәеи АИХқәеи рфинансыркра ҳәаақәызҵо азинтә комплекстә база шыҟоу.  Ажәахәҟаҵаҩцәа ишырҳәаз ала,  Қырҭтәыла анапхгара, Европа Ахеилак аҟны аусеицура ала,  уажәазы иҟоу азакәанҧҵаратә база арҕәҕәара рҽазыркыр рылшоит.