Еврокомиссиа  Венгриа ҩымз аҿҳәара анаҭоит «Амилаҭтә хьыҧшымра ахьчара иазку» азакәан Евроеидгыла астандартқәа ирышьашәаланы ирыҧсахырц азыҳәан, мамзар,  Еврокомиссиа Евроеидгыла аӡбарҭа иадҵаалоит.

Еврокомиссиа аҳәамҭа ишану ала, Евроеидгыла Венгриа азцәырнагеит иҵаҵгәырку аихшьаала, иара убас, аҳәара ҟарҵеит зыӡбахәы ҳәоу азакәан дырҧсыҽырц, ари азакәан инақәырәшаны,  аполитикатә мотивқәа рыла аҳәаанырцәынтә афинансқәа зауа аполитикатә гәыҧқәа абахҭа иҭаркуеит.

Ҧхынҷкәын азы Венгриа ирыдыркылаз  «Амилаҭтә хьыҧшымра иазку» азакәан ала иазҧхьагәаҭоуп аполитикатә аҽалагалара ашәарҭара ҭызҵааша ихьыҧшым аорган аҧҵара. Азакәан инақәыршәаны, аҳәаанырцәынтә афинансқәа зауа, алхрақәа ирылахәы аполиткиатә партиақәеи агәыҧқәеи рылахәылацәа хышықәса рыла  рҭакра ҟалоит. Уажәы Венгриа иҵаҵгәырку аихшьаала аиуит, уи аҿы иаҵшьны иазгәаҭоуп ари азакәан Евроеидгыла астандартқәа ирышьашәаланы иҧсахтәуп ҳәа.  Бриуссель ргәы ишаанаго ала, ари азакәан  Евроеидгыла адемократиатә принципқәеи ахадаратә зинқәеи еиланагоит. Венгриа анапхгаратә партиа  «Фидес» алахәылацәа ргәаанагарала, ари азакәан хымҧада иҟазароуп аҳәаанырцәтәи аполитикатә аҽалагалара аҟынтә аҽыхьчаразы.