Евроеидгыла атәылақәа рахь анеирна аҧҟара ҿыцқәа рсистема ETIAS аларҵәара хырҧоуп 2025 шықәса ааԥынранӡа, – иануп аминистериал ашьҭахь аларҵәара зауз аҳәамҭа аҿы.

Аҳәамҭа инақәыршәаны, ахеилак Евроеидгыла аинформациатә система амч аиура аграфик ҿыц адгылеит.

2025 шықәсазы Евроеидгыла атәылақәа рахь анеиразы авизадатә режим змоу атәылақәа  рзы асистема ҿыц амч анаиулак, Европа атәылақәа рахь авизада анеира азин змоу еиуеиҧшым атәылақәа ртәылауаа, Европаҟа идәықәлаанӡа, аелектронтә форма хадырҭәаароуп, анеҩс, дара аелектронтә ҧошьҭала авторизациа роуеит. Ари амаҵзура 7 евро иаҧсоуп. Ари асистема рхы иадырхәароуп  Шенгентәи азонашҟа авизада инеиуа 60 ҳәынҭқаррақәа ртәылауаа, Қырҭтәыла атәылауаагьы нрылаҵаны.  Авторизациа зауа атәылауаа хышықәса рыҩныҵҟала авизада Европаҟа анеира азин роуеит. Еврокомиссиа аинформациа инақәыршәаны, 18  шықәса инаркны  70 шықәсанӡа зхыҵуа ауааҧсыра Шенгентәи азона алаларазы 7 евро  ашәахтә ршәароуп.