Ареспубликатә хәышәтәырҭа ареанимациатә аҟәша анапхгаҩыи аполиклиника аусзуҩцәеи аҳәамҭа ҟаҵаны, ирымоу аҳәарақәа ирылацәажәеит.

Гьаргь Дундуа ишиҳәаз ала, дара аклиника аиҭашьақәыргылара аханатәтәи аплан азыхынҳәреи, аклиника адиректор иамхреи, аҧыза-министр иҧылареи иаҳәоит.

«Раҧхьа иргыланы, ҳара  аклиника аиҭашьақәыргылара аханатәтәи аплан азыхынҳәра ҳаҳәоит, избанзар,  ари аплан инақәыршәаны,  аклиника аиҭашьақәыргыларатә усурақәа раангьы ахәышәтәырҭа аусура иаҟәыҵуам,  иара убас,  иарбанызаалак аргылара-аиҭашьақәыргыларатә усурақәа раан амедперсонал зегьы рџьаусҧса роуеит. Насгьы,  аклиника уажәтәи адиректор аклиника аинтересқәа ааирҧшуам,   аклиника ахьӡ лаирҟәоит,  иҧхықәрақәа наигӡом,  убри аҟынтә,  иамхрагьы ҳаҳәоит Ахҧатәи аҳәара аҧыза-министр иҧылара иазкуп,  иара ииашоу аинформациа имам ҳәа ҳгәы иаанагоит,  убри аҟынтә,  ҳаиҧылар ҳҭахуп», — иҳәеит ареанимациатә аҟәша анапхгаҩы.