Қырҭтәыла апарламент  атәыла ахада «Алхратә закәанеидкыла» иалагалоу аҧсахрақәа ирызкны иҟалҵаз азгәаҭарақәа азҧхьагәанамҭеит.

Абжьыҭира апроцедура ашьҭахь,  адепутатцәа «Ахратә закәанеидкыла» иалагалоу аҧсахрақәа рзы абжьыҭира еиҭамҩаҧганы, ишьақәдырҕәҕәеит.

Зыӡбахәы ҳәоу аҧсахрақәа ирышьашәаланы,  апарламент ахантәаҩы Алхратә комиссиа хада ахантәаҩи алахәылацәеи ралхразы аконкурс рылеиҳәоит,  иара убас,  аконкурстә комиссиа еиҿикаауеит.  Акомиссиа еиҿкаахоит жәҩык алахәылацәа рыла – аӡәы атәыла ахада лхаҭарнак иакәхоит,  ааҩык атәылауаҩратә сектори аҵарадырратә гәыҧқәеи рхаҭарнакцәа роуп. Аҧсахрақәа инрықәыршәаны,  Қырҭтәыла апарламент ахантәаҩы апарламент адигалоит Алхратә комиссиа ахантәаҩи акомиссиа алахәылацәеи ркандидатурақәа.

Алхратә комиссиа ахантәаҩи алахәылацәеи алырхуеит 5 шықәса аҿҳәара рыҭаны,  апарламент аилазаара наӡа аҟынтә аиҳара рыбжьқәа рыла.