«Польшеи Украинеи реиҩызаратә еизыҟазаашьақәа иазҧхьагәаҭаны,  Польшеи Украинеи реигәылара иазку  аиқәшаҳаҭра ҿыц анапаҵаҩра иаамҭоуп», — иҳәеит Польша ахада Анџьеи Дуда Украина Иреиҳаӡоу Радаҿы данықәгылоз.

Дуда  ишазгәеиҭаз ала, урыстәылатәи агрессиа лабҿаба аанарҧшит Польшеи Украинеи рыбжьара уажәазы иҟоу автомобилтәи, аихамҩатәи, аинфраструктуратәи коммуникациақәа шазымхо. Иара иажәақәа рыла, ари аҭагылазаашьа ириашатәуп,  Польшеи Украинеи рҳәаа иакызароуп, еиҟәшамзароуп.

Польша ахада Радаҿы данықәгылоз уаҟа иҟан Украина ахадеи аиҳабыра алахәылацәеи.

Украинатәи АИХ адыррақәа рыла,  Володимир Зеленски Польша аҭабуура азаарҧшны, ишазгәеиҭаз ала, хара имгакәа Рада иаларҵоит   «Украина иҟоу Польша атәылауаа азинтә статус ҷыда ранашьара иазку» азакәанпроект.

Иахьа Анџьеи Дудеи   Володимир Зеленскии ишиашо аиҧылара мҩаҧыргоит.