Абҵара 5 рзы Америка  47-тәи ахада далырхуеит. Апрезиденттә алхрақәа рҿы еиҿагылоит ареспубликатә партиа аҟынтә ҧасатәи ахада Дональд Трампи адемократиатә партиа аҟынтә   –  авице-ахада Камала Ҳарриси.

                                                               Алхратә система

Америка алхратә системаҿы ахадаратә ҵакы амоуп алхратә коллегиа, уаҟа аштат цыҧхьаӡа ахаҭарнакра ауааҧсыра рхыҧхьаӡара иахьыҧшуп. Иаҳҳәап, аколлегиаҿы Калифорниа  55 бжьы амоуп.

Зынӡа алхратә коллегиа иалоуп  538ҩык аделегатцәа, алхрақәа рҿы аиааиразы акандидат 270 быжьқәа иоуроуп.

                                                          Алхратә кампаниа

Адемократиатә партиа аҟынтә акандидат, авице-ахада Камала Ҳаррис алхратә кампаниаан асоциалтә зҵаарақәеи, арепродукциатә зинқәеи агәабзиарахьчареи хшыҩзышьҭра рзылуан. Ҳаррис аекономикатә политикагьы дазҿлымҳан, ҷыдала, аинфлиациа аҿагылареи америкатә алхыҩцәа рыбзазаратә харџьқәа реиҵатәреи.

Ареспубликатә партиа аҟынтә акандидат Дональ Трампгьы алхратә кампаниаан аекономикатә зҵаарақәа дрылацәажәон. Трамп алхыҩцәа ирыдигалеит аинфлиациа еиҵазтәуа, аусуратә ҭыҧқәа еиқәзыршәо аполитикашҟа ахынҳәра. Иара убас, Трамп изакәаным амиграциа иадҳәалоу азҵаарақәагьы дырзааҭгылон.

                             Алхыҩцәа рактивреи алҵшәақәа разыҧшреи

Абжьыҭира азин рымоуп  150 миллионҩык иреиҳаны америкауаа, арҭ алхрақәа рҿы зеиҧшҟамлац ала идууз  2020 шықәсатәи арбага аасҭа иаҳа идуу активра иазыҧшуп.  80 миллионҩык америкауаа абжьыҭира мҩаҧыргеит абҵара  5-нӡа, алхрақәа рымшынӡа. Иахьа, раҧхьатәи алхырҭақәа аартын қарҭтәи аамҭала асааҭ  09:00 рзы.

Асоциологиатә ҭҵаарақәа рыла, Трампи Ҳарриси рреитингқәа рыбжьара аиҧшымра хәыҷуп. Убри аҟынтә, зегьы реиҳа аконкуренциа ахьдуу аштатқәа рҿы  абыжьқәа рыҧхьаӡаразы иаҳа ирацәаны аамҭа аҭаххоит. Убри адагьы, Трамп изныкымкәа  иҳәахьеит алхрақәа рҧаршеира аҽазкра шыҟоу. Убри аҟынтә, аштатқәа рацәа рҿы абыжьқәа реиҭаҧхьаӡара рықәшәар ҟалап. Убри амшала, аҵыхәтәантәи алҵшәақәа рылаҳәаразы иаҳа ирацәаны аамҭа аҭаххоит.