«Анаклиатәи абаҕәаза аргылара иалахәы китаи-сингапуртәи аконсорциум   асанкциақәа ззышьақәыргылоу аилахәырақәа рсиа ианым», — иануп Қырҭтәыла Аекономика аминистрра аҳәамҭаҿы.

Аҳәамҭа инақәыршәаны, китаи-сингапуртәи аконсорциум азы жәларбжьаратәии америкатәии асанкциақәа шьақәыргылам.

«Ҳара аоппозициатә политикатә партиақәа амедиаҿы иаладырҵәаз аинформациа ҳахцәажәар ҳҭахуп. Раҧхьа иргыланы иаҵшьны иазгәаҭатәуп Анаклиатәи абаҕәаза аргылара иалахәы  китаи-сингапуртәи аконсорциум  асанкциақәа ззышьақәыргылоу аилахәырақәа рсиа ишаным, ари аконсорциум изакәызаалак жәларбжьаратәи асанкицак азышьақәыргылам. Зыӡбахәы ҳәоу аинформациатә кампаниа аполитикатә ашьаҭа амоуп, уи Анаклиатәи абаҕәаза аргылара аҧырхагахара иазкуп.

China Communications Construction Company Limited – китаи-сингапуртәи аконсорциум иалоу, аҧхьагылара змоу еилахәыроуп.  Хара имгакәа уи ажәалагалақәа ҳрыхәаҧшны,  апартниорра иазку аиқәшаҳаҭразы аиҿцәажәарақәа иалагоит.

China Communications Construction Company Limited — идуӡӡоу китаитәи еилахәыроуп, уи аекономикатә усхкқәа зегьы рҿы аргыларатә усурақәа мҩаҧнагоит.

Аконсорциум егьи алахәыла  — China Harbour Investment LTD,  китаитәи аҳәынҭқарратә еилахәыроуп, уи Сингапур ашәҟәы иҭагалоуп. Ари аилахәыра абаҕәазақәеи, алогистикеи, аинфраструктуратә проектқәеи аҧара рыланаҵоит.

Аполитикатә партиақәак иаладырҵәаз аинформациа ҧаршеи иадҳәаланы иазгәаҭҳар ҳҭахуп Анаклиатәи абаҕәаза апроект аҭҵаара анымҩаҧысуаз, арзаҳал алазҵаз аилахәыра иарбанзаалак жәларбжьаратәи асанкциақәа азышьақәыргыламызт.