Қырҭтәыла аҧыза-министр Иракли Кобахиӡе аофициалтә визитла Казахстантәи ареспублика даҭааит.

Астанатәи жәларбжьаратәи аҳаирбаҕәазаҿы Қырҭтәыла аиҳабыра рнапхгаҩы диҧылеит Казахстантәи ареспублика атранспорт аминистр Нурлан Сауранбаев.

Иахьа, Казахстан Ахьыҧшымра аханаҿ,  имҩаҧгахоит Қырҭтәыла аҧыза-министр иҧылара аофициалтә церемониа. Иракли Кобахиӡе дидикылоит Казахстан ахада Касим-Жомарт Токаев. Аплан иарбоуп Қырҭтәыла аҧыза-министри Казахстантәи ареспублика ахадеи ишиашоу, иара убас, ирҭбаау аформатқәа рҿы реиҧыларақәа, убри анеҩс, ҩ-тәылак русбарҭақәа еиуеиҧшым аусхкқәа рҿы аусеицура амеморандумқәа рыбжьарҵоит.

Аофициалтә визит аҳәаақәа ирҭагӡаны, Қырҭтәыла аиҳабыра рнапхгаҩы Казахстантәи ареспублика аҧыза-министр Олжас Бектенов диҧылоит. Аиҧылара рхы аладырхәоит аҩ-тәылак реиҳабырақәа рылахәылацәа.

Қырҭтәыла аҧыза-министр аделегациа ицуп. Аделегациа иалоуп авице-аҧыза, адәныҟатәи аусқәа рминистр Мака Боҷоришвилии, аекономикеи иҭышәынтәалоу аҿиареи рзы аминистр Мариам Қвривишвилии, аҧсабара ахьчареи ақыҭанхамҩеи рзы аминистр Давиҭ Сонҕулашвилии, аиҳабыра радминистрациа аиҳабы Леван Жоржолиании.