Խորհրդարանական մեծամասնության ղեկավար Իրակլի Կոբախիձեն և խորհրդարանի արտաքին հարաբերությունների կոմիտեի նախագահ Նիկոլոզ Սամխարաձեն Գերմանիա կատարած այցի ընթացքում հանդիպել են Բունդեսթագի պատգամավոր, Քրիստոնյա-դեմոկրատական ​​միության արտաքին քաղաքականության քարտուղար Ռոդրիխ Կիզեվետերին:

Զրույցի ընթացքում քննարկվել է Վրաստանի հատուկ դերը Աֆղանստանում ՆԱՏՕ-ի առաքելության կազմում: Ռոդրիխ Կիզեվետերի խոսքով, վրացական պաշտպանական ստորաբաժանումներն առանձնանում են բարձր արհեստավարժությամբ, ինչի համար Բունդեսթագի պատգամավորը շնորհակալություն է հայտնել վրաց ժողովրդին և հատկապես վրացական բանակին:

Ռոդրիխ Կիզեվետերը նշեց, որ վրացական բանակի պրոֆեսիոնալիզմը ևս մեկ լրացուցիչ փաստարկ է, թե ինչու Վրաստանը պետք է դառնա ՆԱՏՕ-ի անդամ:

Կողմերը նշել են, որ երկու երկրների հարաբերությունները գտնվում են բարձր մակարդակի վրա, ինչը հետհամաճարակային շրջանում պետք է էլ ավելի խորացվի:

«Մենք խոսեցինք ԵՄ ինտեգրման ուղղությամբ ձեռնարկվելիք քայլերի մասին: Ռոդրիխ Կիզեվետերը նաև նշել է, որ ԵՄ-ից անհրաժեշտ են լրացուցիչ ջանքեր՝ Վրաստանին այս ճանապարհին ավելի շատ գործիքներ տրամադրելու համար:

Գերմանիան սատարում է Վրաստանի հավակնոտ ծրագրին՝ իրականացնել եվրոպական բարեփոխումներ և դառնալ Եվրամիության լիիրավ անդամ», – ասել է Նիկոլոզ Սամխարաձեն հանդիպումից հետո:

Տեղեկատվությունը տարածում է Վրաստանի խորհրդարանի մամուլի ծառայությունը: