Մենք համոզիչ հաղթանակ ենք տանում, սակայն այժմ այն պահն է, որ բոլորս պետք է դուրս գանք դաշտ,- այս մասին հեռուստաուղերձի ժամանակ հայտարարել է Վրաստանի նախկին նախագահ Միխեիլ Սաակաշվիլին:

Նրա խոսքով, հոկտեմբերի 31-ին սովորական ընտրություններ չեն լինելու:

«Հոկտեմբերի 31-ին կլինեն պատմական ընտրություններ, քանի որ որոշվելու է, մենք երկիր կունենանք, թե Վրաստանն ընդհանրապես անհետանալու է քարտեզից: Ուստի կցանկանայի դիմել ազգային շարժման և միացյալ ընդդիմության ցուցակի անդամներին և բոլոր ակտիվիստներին, մենք համոզիչ հաղթանակ ենք տանում, սակայն այժմ այն պահն է, որ բոլորս պետք է դուրս գանք դաշտ: Նրանք շատ հնարքներ ունեն, և մենք չպետք է մեզ թույլ տանք որ նրանք բարձրացնեն գլուխները: Մենք պետք է լինենք ամենուր, խոսենք մարդկանց հետ, միայն «ֆեյսբուքում» գրառումները բավարար չեն, սակայն դա նույնպես կարևոր է: Անձնական շփմամբ համոզեք յուրաքանչյուրին, որ արժե մասնակցել ընտրություններին: Չկա ոչ մի ավելորդ մարդ, ոչ մի րոպե կորցնելու չունենք, յուրաքանչյուր րոպեն թանկ է, և ես ինքս հիմա հաշվում եմ յուրաքանչյուր րոպեն: Մեզ շատ քիչ ժամանակ է մնացել համոզիչ հաղթանակ տանելու համար»,- ասել է Սաակաշվիլին: