Ныгуылæн архайы Хуссар Кавказы æмæ Астæуккаг Азийы бæстæты Уæрæсейæ ахицæн кæныныл йæхи æмгуыстады структурæтæ саразгæйæ, Мæскуы та ахæм фæлварæнтæ бауромдзæн æппæт гæнæн фæрæзтæй, загъта Уæрæсейы фæсарæйнаг хъуыддæгты министр Сергей Лавров Минскы Евразиаг æдасдзинады фæдыл æртыккаг æхсæнадæмон конференцийы фæуды фæстæ пресс-конференцийы.

«НАТО æмæ Евроцæдис аразынц сæхи диалогтæ æмæ æмгуыстады структурæтæ Астæуккаг Азийы æмæ Хуссар Кавказы бæстæтимæ, æмæ Ныгуылæны фæнды уыцы бастдзинæдтæй спайда кæнын кæрæдзийæн пайдайæн нæ, фæлæ ацы бæстæты Уæрæсейæ ахицæн кæнынæн.Мах æнæмæнгæй бауромдзыстæм ахæм тенденцитæ æппæт уæвæг дипломатон, политикон æмæ экономикон фæрæзтæй», — загъта Сергей Лавров.

Уæрæсейы фæсарæйнаг хъуыддæгты министр банысан кодта, зæгъгæ, Уæрæсе «никуы сразы уыдзæн, Астæуккаг Азийы æмæ Хуссар Кавказы йæ æмцæдисонты æмæ æмзонд адæмы хорз фæндонæй æнæзакъонæй кæй пайда кæнынц» æмæ сæ «Уæрæсеимæ ныхмæлæудмæ кæй æркæнынц, уый та бынтон æнæрайсгæ у сæ экономикон æмæ политикон интересты цæстæнгасæй».