Гуырдзыстоны премьер-министр Ираклий Къобахидзе Азербайджаны президент Ильхам Алиевимæ фембæлд. Фембæлдыл ныхас цыд Гуырдзыстон æмæ Азербайджаны æхсæн стратегион партнерадыл, афтæ дæр æндæр æмæ æндæр фадыджы æмкуыстдзинад ноджы фæарфдæр кæныны перспективæтыл.

Банысангонд æрцыд дыууæ бæстæйы æхсæн базарадон-экономикон бастдзинæдты рæзты позитивон динамикæ æмæ экономикон æмгуыстады фæдыл æхсæнхицауадон къамисы нысаниуæгджын роль. Гуырдзиаг фарс сбæлвырд кодта цæттæдзинад æввахс рæстæджы къамисы радон рабадт суазæг кæнынмæ.

Дыууæ лидер æруынаффæ кодтой глобалон æмæ регионалон геополитикон фарстатыл æмæ ноджы иу хатт банысан кодтой сабырады нысаниуæгдзинад регионы æнæфæцудгæ æмæ стабилон рæзтæн.

Фембæлды рæстæджы Гуырдзыстон æмæ Азербайджаны æхсæн иумæйаг регионалон проекттæ æмæ сæ роль транспортон æмæ энергетикон бастдзинады фæтыхджындæр кæныны хъуыддаджы афтæ дæр фæныхас кодтой.

Фембæлды фæстæ дыууæ бæстæ бафыстой бадзырдты пакет энергетикæ æмæ транспорты секторты, се æхсæн:

— Гуырдзыстон æмæ Азербайджаны æхсæн электроэнергийы ифтонгады æмæ транзиты сæйраг уавæрты фæдыл 20 азы æмгъуыдмæ æхсæнхицауадон бадзырд;

— 2003 азы къухфыст Азербайджаны газы æлхæд æмæ уæй кæныны бадзырды 20 азы адарддæр кæнын, кæцы æхсæнадон газы ифтонгады æдасдзинадæн гарантитæ дæтты.

Документтæ Гуырдзыстоны фарс экономикæ æмæ æнæфæцудгæ рæзынады министр Мариам Квривишвили, Азербайджаны фарс та экономикæйы министр Микаил Джаббаров æмæ энергетикæйы министр Парвиз Шахбазов бафыстой.

Афтæ дæр бафыстой дыууæфарсон координацион советы протокол, кæцымæ гæсгæ æххæстæй кусдзæн Баку-Тбилис-Карсы ног æфсæнвæндаджы хай. Документ Гуырдзыстоны экономикæйы æмæ æнæфæцудгæ рæзынады министр Мариам Квривишвили æмæ Азербайджаны нымæцон рæзынады æмæ транспорты министр Рашад Набиев бафыстой.

Бадзырдмæ гæсгæ, æхсæз азы æрлæууæны фæстæ, Тбилис æмæ Бакуйы æхсæн æрвылбонон пассажирон æфсæнвæндаджы змæлд сног уыдзæн 26-æм майы.

Гуырдзыстоны премьер-министр Ираклий Къобахидзе æмæ Азербайджаны президент Ильхам Алиев къухфысты церемонийы уыдысты.