Гуырдзыстоны парламентон æвзæрстытæм цæст дарыны тыххæй, Гуырдзыстонмæ æрцыдысты Æхсæнадæмон Республикон Институты (IRI) цыбыр æмгъуыдмæ цæстдарæг миссийы минæвæрттæ.
Миссийы къухдариуæг кæнынц АИШ-ы раздæры конгрессмен Джон Шимкус, Швецийы парламенты уæнг Маргарета Зёдерфельд æмæ IRI-йы президент Дэн Твайнинг.
28 цыбыр æмгъуыдмæ цæстдарæг баиу уыдзысты 20 дæргъвæтин æмгъуыдмæ цæстдарæгмæ, кæцытæ июлы мæйæ бæстæйы уыдысты. Уый руаджы фæхуыздæр уыдзæн миссийы мониторинг æмæ аргълæвæрды гæнæнтæ æвзарæнон процессмæ. Цыбыр æмгъуыдмæ цæстдарджытæ æвзæрстыты бонмæ æркæсдзысты, уый нымæцы æвзарæн фадгуытæ байгом кæнын, хъæлæс кæнын æмæ хъæлæсты нымад æнæхъæн бæстæйы масштабæй.
Æхсæнадæмон республикон институты пресс-релизы куыд банысангонд у афтæмæй, Гуырдзыстоны прогресс Евроцæдисмæ бацæуыны æрдæм баст у уымæй, цас æмвæзадыл бæстæйæн йæ бон уыдзæн æргом, æууæнкджын æмæ легитимон æвзæрстытæ ауадзын.
«Ацы æвзæрстыты фæстиуджытæ аскъуыддзаггæнæг роль æххæст кæндзысты бæстæйы европон интеграцийы фæндаг сбæлвырд кæныны хъуыддаджы. Æвзæрстыты бонæй чысыл фæстæдæр, мисси рапарахат кæндзæн развæлгъау расидæн, æмæ æвзæрстыты фæстæ къуыритæм рапарахат уыдзæн æххæст хыгъдлæвæрд, кæцыйы сконды уыдзæн деталон анализ æмæ рекомендацитæ. Миссийы алы архайд у æнæхин æмæ æнæпартион æмæ æххæст цæуы æвзарæнон процессы æнæкъуылымпыйæ.
IRI сарæзта 250 æхсæнадæмон цæстдарæн миссийы æппæт дунейы, кæцытæ нымад сты сæ æнæхиндзинад æмæ профессионализмæй. Мисси æмдзу кæны Иугонд Нациты Организацийы 2005 азы райсгæ Æхсæнадæмон мониторингы принципты тыххæй декларациимæ. Ацы æхсæнадæмон цæстдарæн мисси æххæстгонд æрцыд АИШ-ы æхсæнадæмон рæзты агентады (USAID) æххуысæй, Æвзæрстыты æмæ политикон процессы фæтыхджындæр кæныны консорциумы (CEPPS) фæлгæтты. Националон Демокративон Институт (NDI) дæр æххæст кæны æхсæнадæмон цæстдарæн мисси Гуырдзыстоны», – ис фыст Æхсæнадæмон Республикон Институты пресс-релизы.