АИШ-ы æвзæрст президент, Дональд Трамп расидтис, цæмæй Урс Хæдзары аппараты хистæр, йæ æвзарæнон кампанийы менеджертæй иу –  Сьюзи Уайлс уыдзæн.

67-аздзыд Сьюзи Уайлс уыдзæн фыццаг сылгоймаг, кæцы ахсдзæн Урс Хæдзары аппараты  хистæры бынат.

«Сьюзи Уайлс мын баххуыс кодта Америкæйы историйы стырдæр политикон уæлахизтæй иу райсынæн æмæ уыд мæ æнтыстджын 2016 æмæ 2020 æзты кампаниты æнæфæхицæнгæнгæ хай. Сьюзи дарддæр кæндзæн æвæллайгæйæ кусын, цæмæй Америкæ ногæй стыр уа. Уый у кад, æмæ Сьюзи уыдзæн фыццаг сылгоймаг Урс Хæдзары аппараты хистæр АИШ-ы историйы. Нæ дызæрдыг кæнын, нæ бæстæ уымæй сæрыстыр уыдзæн» – райхъусын кодта Трамп.

«Ройтерс» куыд фыссы, афтæмæй уый размæ Сьюзи Уайлс 1980 азы Рональд Рейганы президентон штабы куыста.