Rus sərhədçilər Yerevan Hava Limanını rəsmən tərk etdilər. Rus sərhədçilər 1992-ci ildən erməni həmkarları ilə birlikdə Zvartnots Hava Limanında idilər. Onlar Ermənistanın tələbi əsasında Yerevan Hava Limanının ərazisini tərk etdilər.

Erməni mediasının yazdığı üzrə, Ermənistanın Milli Təhlükəsizlik Xidmətinin sərhəd hissələri qüvvələrinin komandanı Edqar Unanyan və Ermənistanda Rusiya Federal Təhlükəsizlik Xidmətinin Sərhəd İdarəsinin rəhbəri, general-leytenant Roman Qolubitski hava buraxılış məntəqəsində dövlət sərhədinin mühafizəsinin erməni tərəfinə təhvil verilməsi haqqında protokolu imzalayıblar.

Sənəddə erməni tərəfi rus sərhədçilərə təşəkkür edir və onların fəaliyyəti ilə bağlı heç bir iradlarının olmadığını bildirir.

Ermənistan Parlamentinin sədri Alen Simonyan, rus sərhədçilərin Zvartnots Hava Limanında pasport yoxlanışını artıq dayandırdığını bildirib.

Rus sərhədçilərin Ermənistanda olması ilə bağlı müzakirələrə Rusiya vətəndaşı Dmitri Sertakovun işi səbəb olub. Ukraynada müharibədən yayınmaq üçün Sertakov Ermənistana gəlib və 2023-cü ilin dekabrında Rusiyanın təhlükəsizlik qüvvələri tərəfindən Yerevanda erməni hüquq-mühafizə orqanlarının əməkdaşlarına xəbər verilmədən saxlanılıb. Sonra Sertakov Rusiyaya deportasiya edilib. Erməni hüquq müdafiəçiləri bu hadisəni Ermənistanın hüquq sisteminə hücum adlandırıblar.

Bununla yanaşı, 2024-cü ilin fevralında Ermənistan hakimiyyəti Kollektiv Təhlükəsizlik Müqaviləsi Təşkilatına üzvlüyünü dondurdu. Bundan sonra tez bir zamanda Ermənistan Parlamentinin sədri Rusiya Federal Təhlükəsizlik Xidmətinin əməkdaşlarının Yerevan Hava Limanını tərk etməli olmalarına dair çağırışla çıxış etdi.