ABŞ Konqresində soyqırım qatilinin necə alqışlandığını bütün dünya gördü, – bu barədə Türkiyənin prezidenti Rəcəb Tayyib Ərdoğan İsrailin baş naziri Benyamin Netanyahunun ABŞ Konqresindəki çıxışı ilə bağlı açıqlama verib.

Türkiyə prezidentinin dediyinə görə, Nümayəndələr Palatası 40 min uşağı, qadını və qocanı öldürən şəxsi alqışlayıb.

“İkinci Dünya Müharibəsinin qaliblərinin iqtisadi, siyasi, hərbi və diplomatik maraqlarını qorumaq üçün yaradılmış hazırkı qlobal sistem indi öz kursunu dəyişir. Uzun müddətdir ki, sistemin problemləri həll etmək qabiliyyətini itirdiyinin əlamətlərini görürük. Sadəcə olaraq yaxın keçmişdə inkişaf edən böhranlara nəzər salmaq kifayətdir ki, sistemin uzun müddət müflis olduğunu göstərək. Məsələn, Suriyada münaqişə 13 ildir, Ukraynada müharibə isə 2,5 ildir ki, fasiləsiz olaraq davam edir. Qəzzada 16 min günahsız uşaq, 40 min dinc sakin həlak olub və 10 aya yaxındır ki, soyqırımı dayandırmaq mümkün olmayıb. ABŞ Konqresində soyqırım törədən qatilin necə alqışlandığını bütün dünya gördü. Digər tərəfdən, Nümayəndələr Palatasından kənarda onlara qarşı tamamilə əks münasibət nümayiş etdirildi. Bu, dünyanın hara getdiyini göstərir”, – deyə Rəcəb Tayyib Ərdoğan bildirib.

İsrailin baş naziri Benyamin Netanyahu dünən Konqresdə çıxış edib. Onun çıxışı ilə paralel olaraq, Kapitolinin qarşısında etiraz aksiyası keçirilib.