Avropalıların əksəriyyəti ölkələrində korrupsiyanın yayıldığını bildirir – “Politico” bu haqda məlumatı “Eurobarometer”in tədqiqatına istinadən yayır.

“Eurobarometer”in tədqiqatına əsasən, avropalıların 68 faizi korrupsiyanın yayıldığını bildirib, ən yüksək faiz isə Yunanıstan (98 faiz), Portuqaliya (96 faiz), Malta (95 faiz) və Sloveniya (95 faiz) sakinləri arasında qeydə alınıb.

Ən aşağı faiz Finlandiya (18 faiz), Danimarka (26 faiz) və Lüksemburqda (43 faiz) qeydə alınıb.

Avropalıların təxminən dörddə biri (27 faiz) gündəlik həyatlarında korrupsiya ilə şəxsən qarşılaşdıqlarını, 75 faizi isə biznes və siyasətin çox sıx bağlı olduğunu, bunun da korrupsiyanın çiçəklənməsi üçün şərait yaratdığını deyib.

Sorğu Avropa Komissiyasının Avropa İttifaqına üzv dövlətlərdə korrupsiyaya qarşı mübarizə tədbirlərini əks etdirən illik qanunun aliliyi hesabatı ilə birlikdə dərc edilib.

“Politico” yazır ki, 2024-cü ilin məruzəsi Avropa İttifaqında “korrupsiyaya qarşı mübarizəyə zərbə vuran” “bəzi cinayət ədliyyəsi islahatları” ilə bağlı narahatlıqları artırıb.

Tədqiqat, qanunvericilərin fevralda korrupsiya və fırıldaqçılığa görə cəzanın azaldılması haqda planı təsdiqlədiyi Slovakiyanı və indilərdə vəzifə səlahiyyətlərindən sui-istifadəyə görə cinayət məsuliyyətini ləğv edən İtaliyanı ayırıb.