Dünya regional və beynəlxalq məsələləri güclü, sülhpərvər və ləyaqətli İranla əməkdaşlıqla həll etmək üçün bu fürsətdən istifadə etməlidir – bu haqda İranın Prezidenti Masud Pezeşkiyan prezidentin andiçmə mərasimində bildirib.

İranın Prezidenti ölkənin dünyada ləyaqətini və maraqlarını qoruyacağına söz verib və deyib ki, “ləyaqət, müdriklik və məqsədəuyğunluq” onun xarici siyasət yanaşmasının üç sütunu olacaq. Masud Pezeşkiyan, dünya ilə konstruktiv əlaqənin onun administrasiyasının xarici əlaqələrinin təməl daşı olacağını təsdiqləyib. İranın Prezidenti Qərbin sanksiyalarının ləğvi üçün hər şeyi edəcəyinə söz verib və eləcə də, əlavə edib ki, onun hökuməti heç vaxt zülm, təzyiq və ikili standartlara boyun əyməyəcək.

“Mən İranın dünya ilə iqtisadi və ticarət əlaqələrinin normallaşdırılmasını İranın qanuni haqqı hesab edirəm və ədalətsiz sanksiyalar aradan qaldırılmayana qədər dincəlməyəcəm. İranla danışıqlarda iyirmi ildən artıq təcrübəyə malik olan hökumətlər öhdəliklərimizə sadiq qaldığımızı və qalacağımızı başa düşməli idilər. İran hər zaman tarixin və bəşəriyyətin doğru tərəfində olub və biz dini inancımız, mədəni dəyərlərimiz və İran sivilizasiyasına əsaslanan bu yolda dayanmağa davam edəcəyik. Qonşu ölkələrlə münasibətlərin yaxşılaşdırılması hökumətin prioriteti olacaq. Qonşu ölkələr öz qiymətli resurslarını gərginliyə və uzunmış rəqabətə sərf etməməlidirlər. Mənim hökumətim bütün qonşu ölkələrin iqtisadi inkişaf, tərəqqi və sinerji ilə gələcək nəsillərin həyatının yaxşılaşdırılması istiqamətində birgə addımlar ata biləcəyi güclü region istəyir” – Masud Pezeşkiyan bildirib.