Bu gün çoxlu sayda  etirazçı gəldi, biz hər bir insanın həyatını və sağlamlığını qorumaq üçün hər şeyi etdik, – Gürcüstanın daxili işlər nazirinin müavini Aleksandre Daraxvelidze jurnalistlərə bildirib.

Aleksandr Daraxvelidzenin qeyd etdiyi kimi, bu gün səhər saatlarından etibarən “Lisi Wonderland”ın ətrafına maksimum sayda polis səfərbər edilib.

“Bilirsiniz ki, səhər saatlarından Daxili İşlər Nazirliyinin müvafiq bölmələri hadisə yerinə səfərbər olunub. Xüsusi tapşırıqlar idarəsi, Tbilisi polisi, patrul polisi ərazidə idi, onların öz mandatını yerinə yetirmək səlahiyyəti var idi, amma görürdünüz ki, kifayət qədər çox sayda etirazçı gəlmişdi. Yollarda müvafiq kordonlarımız var idi, lakin bura geniş ərazi olduğu üçün etirazçılar dolama yollarla polis kordonlarından yan keçə bildilər. Biz ərazidə olan “Pride” tədbirinin təşkilatçılarını və iştirakçılarını heç bir xəsarət almadan təhlükəsiz şəkildə ərazidən çıxara bildik. Hazırda polis vəziyyəti sabitləşdirmək və konkret şəxslərə qarşı istənilən hücumun qarşısını almaq üçün müvafiq polis tədbirləri həyata keçirir.

Bu gün bu məkanı qorumaq üçün maksimum sayda polis səfərbər edilib, lakin bildiyiniz kimi, bütün mitinqlərdə, xüsusən də geniş əraziyə gəldikdə, 100% təhlükəsizliyi təmin etmək və tam müdafiə mümkün deyil. Biz hər zaman bu risklərdən danışırdıq. Çoxlu sayda etirazçının gəldiyini görə bilərsiniz. Biz hər bir insanın həyatını və sağlamlığını qorumaq üçün hər şeyi etdik”- Daraxvelidze bildirib.