Biz antidemokratik təşəbbüsə veto qoymaq və Gürcüstanda təhlükə altında olan vətəndaş cəmiyyətini sədaqətlə qorumaq üçün son hərəkətlərinizi təqdir edirik- bu haqda ABŞ-ın vitse-prezidenti Kamala Harris tərəfindən Gürcüstanın Prezidentinə göndərilmiş məktubda deyilir.

Məktubda həmçinin qeyd olunur ki, ABŞ Salome Zurabişvilinin liderliyini və Gürcüstanda vətəndaş cəmiyyətini qorumaq səyini qiymətləndirir.

“Hörmətli xanım prezident, prezident Bayden və mən Gürcüstanda inkişaf edən hadisələri böyük narahatlıqla izləyirik. Gürcüstanın demokratiyasına təhlükə yarada və onun ABŞ və Avropa ilə münasibətlərinə xələl gətirə biləcək xarici agentlər haqqında qanun layihəsinin Gürcüstanın Parlamenti tərəfindən son vaxtlarda qəbul edilməsi kimi hadisələrin inkişafına görə məyusuq. Biz antidemokratik təşəbbüsə veto qoymaq və Gürcüstanda təhlükə altında olan vətəndaş cəmiyyətini sədaqətlə qorumaq üçün son hərəkətlərinizi təqdir edirik.

Birləşmiş Ştatlar 30 ildən artıqdır Gürcüstanın demokratiyasını və Avro-Atlantik istəklərini dəstəkləyir. 2008-ci ildə Rusiyanın hərbi müdaxiləsindən sonra ABŞ-ın Gürcüstanın suverenliyi və ərazi bütövlüyünə dəstəyi qəti olaraq qalır. Tərəfdaşlığımız ortaq dəyərlərə, ümumi maraqlara və qarşılıqlı hörmətə əsaslanır. Biz Əfqanıstanda çiyin-çiyinə vuruşmuşuq və Birləşmiş Ştatlar kritik infrastrukturun qurulmasına, demokratik təsisatların gücləndirilməsinə və hərbi qüvvələrinizin modernləşdirilməsinə kömək etmək üçün Gürcüstana ən böyük xarici yardım təminatçısıdır. Gürcü xalqı açıq şəkildə Avropa İttifaqı və NATO-da gələcək istədiyini deyir. Onlar hesab edirlər ki, xarici agentlər qanun layihəsi bu gələcəyə təhlükə yaradır və bu səbəbdən ona qəti şəkildə qarşı çıxırlar. Onların bu gələcəyə can atmaq üçün tam hüququ var və onların dinc toplaşmaq və ifadə azadlığına əngəl olmaq üçün gücdən istifadə edilməməlidir. Biz sizin liderliyinizi və Gürcüstanda vətəndaş cəmiyyətini qorumaq səyinizi qiymətləndiririk. Sizin səyləriniz olduqca vacib olacaq, çünki gürcü xalqı ümid edir ki, siz demokratiyanı və Gürcüstanın Avro-Atlantik gələcəyini qoruyacaqsınız. Birləşmiş Ştatlar daha yaxşı gələcək istəyində sizin və bütün gürcülərin yanındadır” – Kamala Harrisin məktubunda qeyd olunub.