ABŞ Dövlət Departamentinin məlumatına əsasən, Co Bayden administrasiyası ABŞ-ın keçmiş yüksək rütbəli rəsmiləri, Rusiyanın xarici işlər naziri Sergey Lavrov və digər Rusiya nümayəndələrinin Ukraynada müharibəyə son qoymaq üçün mümkün danışıqlarla bağlı görüşünü dəstəkləməyib.

Medianın məlumatına əsasən, aprel ayında keçmiş ABŞ rəsmiləri Nyu-Yorkda Sergey Lavrovla görüşüblər. Görüşdə hər iki ölkənin digər diplomatları da iştirak edib.

Bayden administrasiyası danışıqlardan uzaqlaşaraq, Ukrayna rəsmilərinin iştirakı olmadan müharibəni bitirmək üçün mümkün danışıqları nəzərdən keçirməyəcəyini bildirib.

Ağ Evin milli təhlükəsizlik sözçüsü Con Kirbi CBS News telekanalına müsahibəsində bildirib ki, Ağ Ev qeyri-rəsmi müzakirələrdən xəbərdardır.

“Açıq şəkildə bildirmək istəyirəm ki, bu müzakirələr bizim tərəfimizdən təşviq olunmayıb və ya təşəbbüs olmayıb. Biz bunu dəstəkləmirik”, – Kirbi bildirib.