Նիկոլ Փաշինյան. Երկրում արդարադատությունը կամ ազնվությունը հասանելի են միայն այն էլիտաներին, որոնք ունեն փող և կապեր, սա հիմնարար խնդիր է, որը լուծելն անհրաժեշտ է
Երկրում արդարադատությունը կամ ազնվությունը հասանելի են միայն այն էլիտաներին, որոնք ունեն փող և կապեր, սա հիմնարար խնդիր է, որը լուծելն անհրաժեշտ է, – այս մասին հայտարարել է Հայաստանի վարչապետ Նիկոլ Փաշինյանը՝ «Դատախազների եվրոպական երկխոսության հայկական հարթակ» երկօրյա միջոցառման բացման արարողության ժամանակ։
Փաշինյանի խոսքով՝ եթե արդարադատությունն ու ազնվությունը հասանելի են միայն էլիտային, ապա դրանք պարզապես գոյություն չունեն։
Նիկոլ Փաշինյանը նշել է, որ ինքը չի կարող հարցի իրավական վերլուծություն կատարել, սակայն կարող է փոխանցել հասարակության հետ շփումների արդյունքում ձևավորված տպավորությունը։
«Ընդհանուր առմամբ, իմ հարգելի գործընկերներ, տպավորությունը շատ բացասական է, և ևս մեկ անգամ եմ կրկնում՝ դա տեսել եմ նաև նախընտրական քարոզարշավի ժամանակ։ Նախընտրական քարոզարշավի առանձնահատկությունն այն է, որ կարճ ժամանակում շփվում ես հանրապետության բնակչության բոլոր շերտերի հետ, և երբ այդ հարցը ամեն օր է առաջանում, նշանակում է, որ այստեղ համակարգային խնդիրներ ունենք։ Նաև ուզում եմ ասել, որ համակարգային խնդիրն այն էլ է, որ ղեկավարությունը շատ հաճախ է փոխվում, բայց համակարգը միասնական է, այն գործում է իր սեփական տրամաբանությամբ։ Համենայն դեպս, հենց մի կողմ նայեցիք, համակարգը նորից կսկսի գործել իր սեփական տրամաբանությամբ, և ոչ ոք չի կարողանա 24 ժամ շարունակ մանրադիտակի տակ մոնիթորինգի ենթարկել նույն հարցը», – հայտարարել է Հայաստանի վարչապետը։