Ելույթ ունենալով պանելային քննարկման ժամանակ՝ ՄԱԿ-ի Զբոսաշրջության համաշխարհային կազմակերպության գլխավոր քարտուղար Զուրաբ Պոլոլիկաշվիլին խոսեց ներդրումային ուղեցույցի մշակման գործընթացի մասին, որը հրատարակվել է զբոսաշրջային կազմակերպության կողմից և որի պատրաստմանը ակտիվորեն ներգրավված է եղել էկոնոմիկայի նախարարության «Արտադրիր Վրաստանում» գործակալությունը:

Պոլոլիկաշվիլիի խոսքով, երբ ՄԱԿ-ի Զբոսաշրջության համաշխարհային կազմակերպությունը ստեղծեց ներդրումային բաժինը, որոշվեց օգնել այն երկրներին, որոնք ցանկանում էին ուղղակի օտարերկրյա ներդրումներ ներգրավել։ Զուրաբ Պոլոլիկաշվիլիի խոսքով, դրա համար անհրաժեշտ էր մշակել ուղեցույց, և այս ուղղությամբ հատուկ դերակատարում է ունեցել Ներդրումային բանկը (KAF Investment Bank):

«Մենք ստեղծել ենք ուղեցույց, թե ինչպես խոսել ներդրողների հետ և ինչպես համոզել նրանց, թե ինչու պետք է ներդրումներ կատարեն զբոսաշրջության ոլորտում։ Մենք զրուցել ենք անդամ երկրների հետ, բնականաբար նրանցից յուրաքանչյուրն ուներ իր աշխարհաքաղաքական դիրքը, քաղաքական հայացքներն ու առանձնահատկությունները»,- ասաց Զուրաբ Պոլոլիկաշվիլին։

Նրա տեղեկություններով՝ արդեն մոտ 20 նմանատիպ ուղեցույց է մշակվել աշխարհի տարբեր երկրների համար։

«Առաջին հերթին պետք է գալ Վրաստան, հետո գումար ներդնել. սրանք երկու լավագույն բաներն են, որ ներդրողը պետք է անի»,- ներկաներին դիմեց Զուրաբ Պոլոլիկաշվիլին։