Գիորգի Աբրամիշվիլիի անվան ռազմական հոսպիտալը հաջողությամբ անցել է գերմանական KTQ կազմակերպության հավատարմագրումը, ինչը վկայում է այն բանի, որ բուժհաստատությունը հոգ է տանում հիվանդների անվտանգության և բարձրակարգ բժշկական ծառայությունների մատուցման մասին,- այս մասին նշված է Պաշտպանության նախարարության տեղեկատվության մեջ։

Գերատեսչության հաղորդմամբ՝ Պաշտպանության նախարարությանը պաշտոնապես հանձնվել է բժշկական գործընթացներին և հիվանդների անվտանգության չափանիշներին համապատասխանության և որակի կառավարման միջազգային սերտիֆիկատը։ Հանդիպմանը ներկա են եղել պաշտպանության փոխնախարար Դավիթ Սուջաշվիլին, զինվորական հոսպիտալի տնօրեն Շալվա Մաղլակելիձեն, KTQ-ի ներկայացուցիչներ։

Գերմանական կազմակերպության փորձագետ աուդիտորները մշտադիտարկում են իրականացրել զինվորական հոսպիտալի բոլոր բաժանմունքներում և գնահատել այնպիսի ուղղություններ, ինչպիսիք են՝ կառավարում, որակի կառավարում, հիվանդների և աշխատակիցների կողմնորոշում, անվտանգության և ռիսկերի կառավարում, տեղեկատվություն և հաղորդակցություն: Նրանք հիվանդանոցին տվել են առաջարկություններ, որոնք փուլ առ փուլ կիրականացվեն։ Միջազգային հավատարմագրումը զինվորական հոսպիտալին հնարավորություն է տալիս 2025 թվականից մասնակցել համընդհանուր առողջապահական ծրագրին՝ համաձայն կառավարության համապատասխան որոշման։ KTQ – «Համագործակցություն առողջապահության թափանցիկության և որակի ոլորտում» Առողջապահության որակի միջազգային ասոցիացիայի (ISQua/ISQuaIEEA) գերմանական կազմակերպության անդամ է: