Ժողովրդական պաշտպանի աշխատակազմ․ Օմբուդսմենի ներկայացուցիչներն այցելել են դատապարտյալ Գիորգի Դավիթաձեին և երեք այլ բանտարկյալների, որոնք բողոքում էին Դավիթաձեի նկատմամբ իրականացված գործողությունների դեմ

Հոկտեմբերի 3-4-ը Վրաստանի ժողովրդական պաշտպանի ներկայացուցիչները գտնվել են №6 քրեակատարողական հիմնարկում, որտեղ այցելել են դատապարտյալ Գիորգի Դավիթաձեին և երեք այլ բանտարկյալների, որոնք բողոքում էին Գիորգի Դավիթաձեի նկատմամբ իրականացված գործողությունների դեմ․ այս մասին հայտնում է Ժողովրդական պաշտպանի աշխատակազմը։

«Հանրությանը հայտնի է, որ 2026 թվականի հոկտեմբերի 4-ին Գիորգի Դավիթաձեն կլանել է մի քանի անհայտ փոքր չափի առարկա։ Ժողովրդական պաշտպանի ներկայացուցչի հետ հանդիպման ժամանակ Գիորգի Դավիթաձեն պարզաբանել է, որ իրեն լավ է զգում։ Միևնույն ժամանակ, նա հրաժարվել է կլինիկա տեղափոխվելուց։

Դավիթաձեի հայտարարությամբ՝ նշված որոշումը բողոքի ձև է, և նա չի համաձայնի կլինիկա տեղափոխվել, քանի դեռ իրեն աջակցելու համար ապաէսկալացման սենյակներ տեղափոխված բանտարկյալներին չեն վերադարձրել խցեր։

Ժողովրդական պաշտպանի ներկայացուցիչները զրուցել են նաև այն բանտարկյալների հետ, որոնք իրենց աջակցությունն են հայտնել Գիորգի Դավիթաձեին։ Նրանք խոսել են բողոքի պատճառների և հիմնարկում տիրող պայմանների մասին։

Ժողովրդական պաշտպանի աշխատակազմը կշարունակի Գիորգի Դավիթաձեի իրավունքների պաշտպանության հարցի մոնիթորինգը»,- նշված է Օմբուդսմենի աշխատակազմի տեղեկատվության մեջ։