Եվրոպայի օրվա կապակցությամբ Թբիլիսիում անցկացվում է երթ, որին մասնակցում են ընդդիմադիր կուսակցությունները, ոչ կառավարական կազմակերպություններ, ակտիվիստներ և քաղաքացիներ։ Նրանք հավաքվել են հինգ տարբեր վայրերում և շարժվում են Եվրոպայի հրապարակ։

Ինչպես լրագրողներին հայտնել է «Ազգային շարժման» առաջնորդներից Իրակլի Ֆավլենիշվիլին, հասարակության այն հատվածը, որը պայքարում է ոչ միայն եվրոպական ապագայի, այլև ավելի լավ Վրաստանի համար, այսօր ևս հավաքվել է՝ նշելու Եվրոպայի օրը։

«Ցավալի է, որ այս բողոքի բուն պատճառը այն է, ինչի շուրջ արդեն համախմբված էինք՝ եվրոպական ինտեգրման գործընթացի շարունակումը։ Ցավոք, իշխանությունը յուրացրած Իվանիշվիլին այսօր հակասության մեջ է վրաց ժողովրդի հետ։ Հասարակության այն հատվածը, որն պայքարում է ոչ միայն եվրոպական ապագայի, այլև ավելի լավ Վրաստանի համար, այսօր էլ հավաքվել է նշելու Եվրոպայի օրը», – հայտարարել է Ֆավլենիշվիլին։

Միևնույն ժամանակ, «Ուժեղ Վրաստան» կուսակցության առաջնորդներից Ալեկո Էլիսաշվիլին նշել է, որ իրենց նպատակը երկրի եվրոպական ապագան վերահաստատելն է։

«Այսօր Եվրոպայի օրն է, և մենք ուզում ենք ցույց տալ, որ ցանկանում ենք, որ Վրաստանը վերջապես դառնա այս ամենից առավել քաղաքակիրթ պետությունների միության՝ Եվրամիության անդամ։ Մենք ցանկանում ենք նաև ցույց տալ, որ չենք կոտրվել, դեռ ամուր ենք և շարունակում ենք կանգնել Վրաստանի պահակակետում», – հայտարարել է Էլիսաշվիլին։