Եվրոպական հեռարձակողների միության (EBU) գլխավոր տնօրեն Նոել Կուրանը հանդիպել է Վրաստանի խորհրդարանի նախագահ Շալվա Պապուաշվիլիի հետ։

Հանդիպմանը մասնակցել են Վրաստանի Առաջին ալիքի գլխավոր տնօրեն Թինաթին Բերձենիշվիլին և Հանրային հեռարձակողի հոգաբարձուների խորհրդի նախագահ Վասիլ Մաղլափերիձեն։

Ինչպես հանդիպումից հետո նշել է Նոել Կուրանը, կառուցողական հանդիպում է տեղի ունեցել խորհրդարանի նախագահի հետ։

«Ես շնորհակալ եմ Շալվա Պապուաշվիլիին նման կառուցողական քննարկման համար ժամանակ հատկացնելու համար։ Խոսեցինք Թբիլիսի իմ ժամանելու նպատակի մասին, որը կապված է Վրաստանի հանրային հեռարձակողի հավակնությունը տեսնելու, ինչպես նաև թվայնացման առումով Վրաստանի հանրային հեռարձակողի ձեռնարկած քայլերի և ընդհանրապես հեռարձակողի հաջողությունների հետ։

Խորհրդարանի նախագահի հետ հանդիպմանը ես ընդգծեցի Վրաստանում հանրային լրատվամիջոցների անկախության, կառավարության կողմից պատշաճ, կայուն, անկախ ֆինանսավորման անհրաժեշտությունը՝ վրացական հանրային հեռարձակողի բոլոր հավակնությունները, այդ թվում՝ թվայնացումը իրականացնելու համար։ Կարծում եմ՝ խորհրդարանի նախագահն ընդունեց այս սկզբունքները, և մենք դրա շուրջ շատ լավ, դրական և կառուցողական քննարկում ունեցանք»,- ասաց Նոել Կուրանը։

Վրաստանի Առաջին ալիքի գլխավոր տնօրեն Թինաթին Բերձենիշվիլին նշել է, որ անհրաժեշտ հանդիպում է կայացել խորհրդարանի նախագահի հետ։

«Մենք խոսել ենք հանրային հեռարձակողի անհրաժեշտության մասին։ Հեռարձակողը իսկապես եվրոպական հաստատություն է, որն էական նշանակություն ունի երկրի ժողովրդավարության և զարգացման համար: Խոսեցինք Հանրային հեռարձակողի անկախության կարևորության, ֆինանսավորման մոդելի և համաձայնության մասին, որը սկզբունքորեն արդեն ձեռք է բերվել խորհրդարանի հետ՝ պետք է խոսել Հանրային հեռարձակողի ֆինանսավորման փոփոխականի մասին։ Դա չի կարող լինել ֆիքսված բյուջե, որը պետք է համաձայնեցվի տարեցտարի։ Դա անհրաժեշտ է խմբագրական քաղաքականության մեջ որևէ միջամտությունից խուսափելու, հանրային հեռարձակողը պահպանելու համար, որը միայն կզարգացնի մեր երկիրը»,- ասել է Թինաթին Բերձենիշվիլին։