Եվրախորհրդի խորհրդարանական վեհաժողովը բանաձեւ է ընդունել, որով Ռուսաստանը ճանաչում է դե ֆակտո բռնապետություն եւ կոչ է անում ապագաղութացնել Ռուսաստանի փոքր ազգերը։

Փաստաթղթում Վլադիմիր Պուտինը մեղավոր է ճանաչվել ռուս ընդդիմադիր Ալեքսեյ Նավալնիի մահվան համար։ Միաժամանակ, վեհաժողովի անդամները Ռուսաստանի նախագահին պատասխանատու են համարում երկրում անձնական բռնապետություն հաստատելու համար։

Բանաձևում ասվում է, որ Պուտինի ռեժիմը նպատակ ունի պատերազմ մղել ժողովրդավարության դեմ և վերանայել եվրոպական և համաշխարհային կարգերը: Այս համատեքստում փաստաթղթում նշվում է 2008 թվականին Ռուսաստանի ներխուժումը Վրաստան։

«Մերձդնեստրի օկուպացիան, 2008 թվականի Վրաստան ներխուժումը, 2014 թվականից ի վեր Ուկրաինայի դեմ շարունակվող պատերազմը, տարածքների անօրինական բռնակցումն ու օկուպացումը, Ռուսաստանի ներսում խոսքի ազատության ոչնչացումը, ապատեղեկատվական պատերազմն աշխարհում, քաղաքական հակառակորդների հալածանքներն ու սպանությունները, երկրի ներսում և դրսում, և իրավական համակարգի ստեղծումը, որը քաղաքականապես քրեականացնում է կարծիքները: Այս ամենը Պուտինի ռեժիմի բնորոշ գծերն են»,- ասվում է ապրիլի 17-ին Եվրախորհրդի խորհրդարանական վեհաժողովի կողմից հաստատված փաստաթղթում:

Տեքստում նշվում է նաեւ, որ Ռուսաստանը չի հարգում հարեւան երկրների ժողովրդավարական ընտրությունն ու քաղաքական անկախությունը։

Նույն բանաձեւում Եվրախորհրդի խորհրդարանական վեհաժողովի անդամները հրաժարվում են ճանաչել մարտին Ռուսաստանում կայացած ընտրությունների արդյունքները, իսկ Ռուսաստանը նշվում է որպես «միայն ֆորմալ դաշնություն»։ Բացի այդ, բանաձեւում նշվում է, որ Ռուսաստանի բնիկ ժողովուրդները բռնի կերպով ռուսացվում և ձուլվում են։

«Ռուսաստանի Դաշնությունում բնիկ ժողովուրդների կորուստը անհամաչափ մեծ է, և դա Ռուսաստանի կանխամտածված քաղաքականությունն է»,- ասվում է փաստաթղթում։

Բանաձեւում նշվում է, որ «ապագաղութացումը» նախապայման է Ռուսաստանում ժողովրդավարության հաստատման համար։

Տեղեկության համար՝ Ռուսաստանը 2022 թվականի մարտին հեռացվել է Եվրախորհրդից։