Եվրոպական խորհուրդը հաստատել է Վրաստանին տրամադրվող ֆինանսական օգնության հերթական փաթեթը Խաղաղության եվրոպական հիմնադրամի (EPF) շրջանակներում։ 20 միլիոն եվրո արժողությամբ օգնությունն ուղղված է երկրի պաշտպանունակության ամրապնդմանը և կնպաստի Վրաստանի ակտիվ համագործակցությանը Եվրամիության հետ՝ Միասնական պաշտպանության և անվտանգության քաղաքականության (CSDP) շրջանակներում։

Վրաստանի պաշտպանության նախարարության տեղեկատվության համաձայն՝ այս տարի առաջին անգամ Խաղաղության եվրոպական գործիքը Վրաստանին կաջակցի կիբերանվտանգության ոլորտում։ Նաև օգնության փաթեթն ուղղված է լինելու ռազմաբժշկական, ռազմա-ինժեներական և տրանսպորտային կարողությունների ամրապնդմանը։

«Վրաստանն արդեն երկրորդ անգամ է ստացել Եվրամիության ֆինանսական օգնությունը պաշտպանության և անվտանգության ոլորտի համար։ 2021 թվականին Վրաստանը EPF-ի ստացած առաջին երկրներից էր։ Այս փաստը ևս մեկ անգամ ցույց է տալիս, որ Եվրամիության համար Վրաստանը տարածաշրջանում ամենակարևոր և վստահելի գործընկերն է, և երկու կողմերն էլ մեծ շահագրգռվածություն ունեն խորացնելու համագործակցությունը պաշտպանության և անվտանգության ոլորտում, այդ թվում՝ տարբեր հիբրիդային վտանգների նկատմամբ կայունությունը բարձրացնելու համար։ Այս կարևոր որոշումը ևս մեկ անգամ հաստատում է Վրաստան-Եվրամիություն համագործակցության դինամիզմը և հստակեցնում, որ անվտանգության հարթությունը երկկողմ օրակարգի կարևոր ոլորտներից մեկն է։ Եվրամիությունը շարունակում է ակտիվորեն ներգրավված լինել Վրաստանում խաղաղության և կայունության հաստատման գործընթացում՝ իր միջազգայնորեն ճանաչված սահմաններում երկրի ինքնիշխանությանն ու տարածքային ամբողջականությանն աջակցելով»,- ասվում է Պաշտպանության նախարարության հաղորդագրության մեջ։

Բացի այդ, Վրաստանում Եվրամիության դեսպան Պավել Հերչինսկու խոսքերով, վերջերս Բրյուսելում հաստատվել է Եվրամիությունից 20 միլիոն եվրո արժողությամբ օգնության նոր փաթեթը։

«Ուկրաինայի դեմ Ռուսաստանի ագրեսիվ պատերազմը չափազանց լուրջ ազդեցություն է ունեցել Եվրոպայի և տարածաշրջանի կայունության վրա։ Վրաստանն ինքնուրույն է պատերազմ ապրել և լավ գիտի ազգային անվտանգության ամրապնդման գինը։ Եվրամիությունն աջակցում է Վրաստանի ճկունությունը՝ ամրապնդելով ազգային անվտանգությունը, կայունությունը պաշտպանության ոլորտում, այդ թվում՝ Խաղաղության եվրոպական գործիքի միջոցով: Օրերս Բրյուսելում հաստատվել է Եվրամիության կողմից 20 միլիոն եվրո արժողությամբ օգնության նոր փաթեթը։ Սա կնպաստի Վրաստանի պաշտպանության ուժերի կարողությունների ամրապնդմանը և կկիրառվի ռազմաբժշկական, ճարտարագիտական, շարժունակության և կիբերանվտանգության ոլորտներում՝ տրամադրելով համապատասխան ոչ մահաբեր զենքեր, պարագաներ և ծառայություններ, ինչպես նաև ուսումնական սարքավորումներ: Օգնության նոր փաթեթով Եվրամիության կողմից Վրաստանին հատկացվող օգնությունը Խաղաղության եվրոպական գործիքի շրջանակներում կգերազանցի 30 միլիոն եվրոն։

Անցյալ տարի Վրաստանի պաշտպանության ուժերին տրամադրված օգնությունը կազմել է մոտ 13 մլն եվրո, որը նախատեսված է եղել Վրաստանի պաշտպանության ուժերի համար բժշկական պարագաներ գնելու և ինժեներական և շարժունակության հզորացման համար։ Այս օգնությունը իրականացման փուլում է։ Եվրամիության բարձր ներկայացուցիչն ընդունել է վրացական կողմից անվտանգության և պաշտպանության քաղաքականության հարցերում նոր օգնության խնդրանքը, ինչին միաձայն համաձայնել են Եվրամիության անդամ բոլոր երկրները։ Ես շատ ուրախ եմ, որ խաղաղության եվրոպական գործիքն օգնում է ամրապնդել Վրաստանի դիմադրողականությունը այս դժվարին ժամանակաշրջանում»,- ասել է Պավել Հերչինսկին։