Այսօր կհրապարակվի Եվրահանձնաժողովի տարեկան զեկույցը ԵՄ ընդլայնման վերաբերյալ։
Զեկույցում Եվրահանձնաժողովը կգնահատի Վրաստանում իրականացվող բարեփոխումները, այդ թվում՝ 12 հանձնարարականների իրականացումը, որոնց հիման վրա Եվրոպական խորհուրդը պետք է որոշում կայացնի երկրին ԵՄ անդամակցության թեկնածուի կարգավիճակ տալու մասին։
Գնահատման փաստաթուղթը հիմնված կլինի օրենսդրական փոփոխությունների և բարեփոխումների վրա, որոնք իրականացվել են 2022 թվականի հունիսից հետո՝ Եվրոպական հանձնաժողովի 12 կետերը կյանքի կոչելու համար։
Ընդլայնման զեկույցը ներառում է տասը երկիր։ Բացի Վրաստանից, զեկույցը կներառի հետևյալ երկրները՝ Թուրքիան, Հյուսիսային Մակեդոնիան, Մոնտենեգրոն, Սերբիան, Ալբանիան, Ուկրաինան, Մոլդովան, Բոսնիա և Հերցեգովինան և Կոսովոն։
2022 թվականի հունիսին Եվրոպական խորհուրդը Վրաստանին շնորհեց եվրոպական հեռանկար և սահմանեց թեկնածուի կարգավիճակ ստանալու 12 առաջնահերթություն։