«Միջազգային թափանցիկություն Վրաստանի» գործադիր տնօրեն, Էկա Գիգաուրին գտնում է, որ բանտարկյալների համաներման փաստով սկսված հետաքննության շրջանակներում պետք է հարցաքննվի նախագահը, հակառակ դեպքում հետաքննությունը կունենա ձևական բնույթ:

Ինչպես հայտարարել է Էկա Գիգաուրին, դեռևս որևէ հայտարարություն չի արվել, թե ինչ չափորոշիչներով է ընտրվել  մի քանի հազար մարդուց 30 բանտարկյալի գործը:

«Այս երկրում արձագանքը տեղի է ունենում միայն այն ժամանակ, երբ կա հասարակական մեծ բողոք: Գտնում եմ, եթե հարուցվել է գործ, ապա պետք է հարցաքննվի նախագահը, հակառակ դեպքում այդ ամենը կունենա ձևական բնույթ: Ինչ վերաբերում է կոռուպցիային, ապա մինչև այժմ հայտարարություն չի արվել, թե ինչ չափորոշիչներով է ընտրվել  մի քանի հազար մարդուց 30 բանտարկյալի գործը: Ես եղել եմ համաներման հանձնաժողովի կազմում և գիտեմ, որ անհնար է բացառել որևէ մեկի գործը, ով բավարարում է համապատասխան չափանիշները, ուստի բոլոր դիմումները  պետք է հաշվի առնվեն, այժմ կարևոր է պարզել, մի քանի հազար դիմումից ինչպես է ընտրվել այս 30 գործը»,- ասել է  Էկա Գիգաուրին:

Վրաստանի գլխավոր դատախազությունը նախագահ, Սալոմե Զուրաբիշվիլիի կողմից բանտարկյալների համաներման փաստով սկսել է հետաքննություն: Վրաստանի նախագահը օգոստոսի 28-ին, Մարիամոբա տոնի կապակցությամբ ներում է շնորհել 34 բանտարկյալի, նրանց թվում էին սպանության համար դատապարտված մարդիկ:

Նախագահի աշխատակազմը ողջունում է Գլխավոր դատախազության կողմից հետաքննություն սկսելու մասին որոշումը: