Եթե ԱՄՆ-ը չի կատարի խոստումը, Թուրքիան կվերսկսի ռազմական գործողությունը. Ռեջեփ Թայիփ Էրդողան
Եթե ԱՄՆ-ը չի կատարի խոստումը, Թուրքիան կվերսկսի ռազմական գործողությունը. Ռեջեփ Թայիփ Էրդողան

Թուրքիայի նախագահ Ռեջեփ Թայիփ Էրդողանի խոսքով, այն դեպքում, եթե հրադադարի մասին համաձայնագրի ժամկետը լրանալուց հետո Միացյալ Նահանգները չեն կատարի խոստումը, Անկարան կվերսկսի ռազմական գործողությունները Սիրիայի հյուսիսային շրջանում:

Այս մասին Ռեջեփ Թայիփ Էրդողանը հայտարարել է Սոչի մեկնելուց առաջ:

Թուրքիայի նախագահի հայտարարությամբ, քրդերի ժողովրդական պաշտպանության ուժերի բոլոր ներկայացուցիչները պետք է հեռանան այսպես կոչված անվտանգության գոտուց:

Հիշեցնենք, հոկտեմբեր 21-ին, «Ռոյթերս» գործակալությունը տարածել էր Թուրքիայի նախագահ, Ռեջեփ Թայիփ Էրդողանի հայտարարությունը, որում նա ասում էր, որ Թուրքիան Սիրիայի հյուսիս-արևելյան մասում անհրաժեշտ քայլեր կձեռնարկեր Ռուսաստանի նախագահ, Վլադիմիր Պուտինի հետ հանդիպումից հետո:

Ռուսաստանի և Թուրքիայի նախագահների հանդիպումը Սոչիում տեղի է ունենալու այսօր: Հենց այսօր է ավարտվում ԱՄՆ-ի միջնորդությամբ հնգօրյա հրադադարի պայմանագրի ժամկետը:

Հիշեցնենք, պաշտոնական Անկարան, Սիրիայի հյուսիս-արևելյան շրջաններում քրդերի դեմ ռազմական գործողությունը սկսել էր հոկտեմբերի 9-ին: Հոկտեմբեր 17-ին, Անկարայում, ԱՄՆ-ի փոխնախագահ Մայք Փենսի և Թուրքիայի նախագահի միջև կայացած հանդիպումից հետո, Թուրքիայի իշխանությունները հայտարարել են հնգօրյա հրադադարի մասին: Պայմանավորվածության համաձայն, քուրդ զինվորականները 120 ժամում պետք է լքեին 30 կիլոմետրանոց գոտին: Թուրքիայի իշխանությունների պնդմամբ, եթե քրդական զինված միավորումները չեն լքի տարածքը, ապա Անկարան կվերսկսի ռազմական գործողությունը: