Ես չեմ կարողանա մեկնաբանել Միխեիլ Սաակաշվիլիի փոխարեն, առավել ևս, ես դեռ չեմ կարդացել նրա հայտարարությունը
«Միացյալ ազգային շարժման» ներկայացուցիչ Զաալ Ուդումաշվիլին հայտարարում է, որ Թեա Ծուլուկիանին պետք է ռուսամետներին իր շարքերում փնտրի: Նա պատասխանել է «Վրացական երազանքի» խորհրդարանական ցուցակի չորրորդ համարի Թեա Ծուլուկիանիի հայտարարությանը, որն ասում է. «Ընդդիմության ներկայիս առաջնորդ Միխեիլ Սաակաշվիլին և նրա կողմից կառավարվող որոշ ուժեր շարունակում են մնալ Վրաստանի հիմնական հակաարևմտամետ ուժը»:
«Ես չեմ ընդունում իշխանության կողմից արված որևէ հայտարարություն, որը մեղադրում է այլ ընդդիմադիր կուսակցություններին ռուսամետության մեջ: Այս մասին խոսում է այն իշխանությունը, որը Գավրիլովին բերեց Թբիլիսի և նրան նստեցրեց խորհրդարանի նախագահի բազկաթոռին, որին հաջորդեց «Գավրիլովի գիշերը»: Սա այն իշխանությունն է, որը Ռուսաստանի հրամանով դադարեցրեց երկրի համար ամենակարևոր նախագիծը՝ «Անակլիայի նախագիծը» և այս երկիրը ղեկավարում է ռուս օլիգարխը:
Թեա Ծուլուկիանին պետք է ռուսամետներին իր շարքերում փնտրի, անկախ նրանից, թե ինչ է խոսում ռուսամետների մասին: Ես չեմ կարողանա մեկնաբանել Միխեիլ Սաակաշվիլիի փոխարեն, առավել ևս ճիշտն ասած, ես դեռ չեմ կարդացել նրա հայտարարությունը», – լրագրողներին հայտնել է Զաալ Ուդումաշվիլին:
«Վրացական երազանքի» ներկայացուցիչ Թեա Ծուլուկիանին այսօր հայտարարություն է տարածել «Ազգային շարժման» առաջնորդ Միխեիլ Սաակաշվիլիի կողմից արված հայտարարության վերաբերյալ: Սաակաշվիլին ռուս գործակալ է անվանել հոլանդացի պատգամավորին, որը գլխավորում էր Եվրոպայի խորհրդի խորհրդարանական պատվիրակությունը Վրաստանում անցկացվող ընտրություններին: