Ենս Ստոլտենբերգ. Մենք կանենք ամեն ինչ մեր դաշնակիցներին պաշտպանելու համար, Բուխարեստում նախարարական հանդիպմանը կքննարկենք Ուկրաինային, Մոլդովային, Բոսնիա-Հերցեգովինային և Վրաստանին օգնելու ուղիները
Մենք կանենք հնարավորը բոլոր դաշնակիցներին պաշտպանելու համար։ ՆԱՏՕ-ի ԱԳ նախարարները Բուխարեստում կքննարկեն Ուկրաինային, ինչպես նաև Ռուսաստանի ճնշման տակ գտնվող այլ գործընկերներին, ինչպիսիք են Բոսնիա-Հերցեգովինան, Վրաստանը և Մոլդովան, ուժեղացնելու օգնությունը, Ռումինիայի նախագահ Կլաուս Յոհանիսի հետ համատեղ մամուլի ասուլիսում ասել է ՆԱՏՕ-ի գլխավոր քարտուղար Ենս Ստոլտենբերգը։
Ստոլտենբերգի խոսքով՝ Ռումինիայում կայացած հանդիպմանը քննարկված թեմաներից մեկը եղել է Ուկրաինայում Ռուսաստանի անօրինական պատերազմի արդյունքում առաջացած մարտահրավերները։
«Այսօրվա հանդիպմանը մենք քննարկել ենք Սևծովյան տարածաշրջանի անվտանգությունը, որն ընդհանուր առմամբ ՆԱՏՕ-ի համար ռազմավարական նշանակություն ունի։ Քննարկեցինք նաև Ուկրաինայում Ռուսաստանի անօրինական պատերազմի հետևանքով առաջացած մարտահրավերները։ Ի պատասխան ռուսական ագրեսիայի՝ ՆԱՏՕ-ն մեծացնում է իր ներկայությունը Բալթիկից մինչև Սև ծով։ Մենք նոր մարտական խմբեր ենք տեղակայել, այդ թվում՝ Ֆրանսիայի գլխավորությամբ այստեղ՝ Ռումինիայում։ Կանադական կործանիչներն օգնում են նաև պաշտպանել ձեր երկինքը, իսկ ԱՄՆ-ի Patriot հրթիռները ուժեղացնում են ձեր պաշտպանությունը: Սա հստակ ուղերձ է, որ ՆԱՏՕ-ն այստեղ է։ Մենք կանենք հնարավորը բոլոր դաշնակիցներին պաշտպանելու համար։ Բուխարեստում ՆԱՏՕ-ի ԱԳ նախարարները կքննարկեն Ուկրաինային, ինչպես նաև Ռուսաստանի ճնշման տակ գտնվող այլ գործընկերներին, ինչպիսիք են Բոսնիա-Հերցեգովինան, Վրաստանը և Մոլդովան օգնությունն ավելացնելու ուղիները», – ասել է Ստոլտենբերգը:
Նոյեմբերի 29-ին Բուխարեստում տեղի կունենա ՆԱՏՕ-ի նախարարական հանդիպումը, որին կմասնակցի Վրաստանի արտաքին գործերի նախարար Իլիա Դարչիաշվիլին։
