ԵՄ ռազմական ռազմավարության նորացված նախագծում խոսվում է Արեւելյան գործընկերների, այդ թվում՝ Վրաստանի աջակցության աճի մասին։ Այդ մասին տեղեկություն է տարածում «Եվրոակտիվը»։ Ինչպես գրում է հրատարակությունը, Ռուսաստանի և Ուկրաինայի միջև լարվածության ֆոնին ԵՄ-ն մտադիր է մեծացնել աջակցությունն իր արևելյան գործընկերներին, այդ թվում՝ պաշտպանության և անվտանգության ոլորտում։

«ԵՄ-ն պետք է մեծացնի իր ներկայացվածությունը, արդյունավետությունը համաշխարհային ասպարեզում՝ համատեղ ջանքերի և ներդրումների միջոցով»,- ասված է ԵՄ ռազմական ռազմավարության թարմացված նախագծում։

Աշխատանքային փաստաթղթում նշվում է նաև, որ ԵՄ-ն «հանձնառու է միասնական, երկարաժամկետ և եվրոպական մոտեցմանը, որը հիմնված է Ռուսաստանի նկատմամբ ԵՄ քաղաքականության հինգ առաջնորդող սկզբունքների վրա»։

«Դա ներառում է Մինսկի համաձայնագրի ամբողջական կատարումը, Ռուսաստանի հարևանների հետ կապերի ամրապնդումը, Ռուսաստանի սպառնալիքներին ԵՄ-ի դիմադրողականության բարձրացումը և միայն որոշակի կոնկրետ հարցերի շուրջ Ռուսաստանի հետ համագործակցությունը։ Ինչպես օրինակ ահաբեկչության դեմ պայքարը և մարդկանց միջև կապերը»,- գրում է «Euroactive»-ը։

ԵՄ ռազմական ռազմավարության թարմացված նախագծում առանձին պարբերություն նվիրված է Արևելյան գործընկերներին։

«Անվտանգության աճող մարտահրավերների պայմաններում, որոնք սպառնում են մեր Արևելյան գործընկերների կայունությանը և կառավարմանը, մենք կմեծացնենք մեր աջակցությունը պաշտպանությանն ու անվտանգությանը»,- ասված է նախագծում։

Ըստ «Euroactive»-ի՝ Արևելյան գործընկերության երկրներին առջև ծառացած մարտահրավերները, որոնք ներառում են Ռուսաստանի թշնամական միջամտությունը և հիբրիդային մարտավարությունը, սպառնում են այդ երկրների ժողովրդավարական գործընթացին, ինչպես նաև ազդում են Եվրամիության անվտանգության վրա։

«ԵՄ-ի մերձավոր գործընկերների՝ Վրաստանի, Ուկրաինայի և Մոլդովայի հետ հատուկ երկխոսությունը կամրապնդվի այնպիսի ոլորտներում, ինչպիսիք են հիբրիդային սպառնալիքները, ապատեղեկատվությունը և կիբերանվտանգությունը», – ասվում է փաստաթղթում։

ԵՄ ռազմական ռազմավարության նախագիծը անդամ երկրների արտգործնախարարներին է փոխանցվել անցյալ տարվա նոյեմբերին, եւ նրանք հնարավորություն են ունեցել փոփոխություններ մտցնել փաստաթղթում։ Նախագծի վերջնական տարբերակը մարտին կհաստատվի ԵՄ ղեկավարների կողմից։