Միջազգային դիտորդների կողմից այցելված սահմանափակ թվով ընտրատեղամասերում ընտրությունների գործընթացը թափանցիկ էր և ընթացակարգերը հիմնականում պահպանվում էին, ասվում է ԵԱՀԿ / ԺՀՄԻԳ-ի վերջնական զեկույցում, որը վերաբերում է Վրաստանում 2020 թվականի հոկտեմբերի 31-ին կայացած խորհրդարանական ընտրություններին:

Փաստաթղթում նշվում է, որ ընտրությունների օրը կուսակցության ներկայացուցիչների և կուսակցությանն առնչվող քաղաքացիական դիտորդական խմբերի չափազանց մեծ քանակը նպաստեց ընտրատեղամասերի բազմամարդությանը:

«ԺՀՄԻԳ-ում սահմանափակ դիտորդական առաքելության որոշ զրուցակիցներ վախեցնող են համարել տեղամասերում կուսակցության համակարգողների և ակտիվիստների մեծ ներկայությունը, որոնք հաճախ գործում էին իշխող կուսակցության անունից: Մի քանի քաղաքացիական դիտորդական կազմակերպություններ երկարաժամկետ դիտորդական առաքելություններ են իրականացրել և կարճաժամկետ դիտորդներ ներկայացրել ընտրությունների օրը՝ նպաստելով գործընթացի ընդհանուր թափանցիկությանը: Այնուամենայնիվ, կուսակցությունների ներկայացուցիչների և կուսակցության հետ կապված քաղաքացիական դիտորդական խմբերի չափազանց մեծ քանակը նպաստեց ընտրատեղամասերի բազմամարդությանը: Նրանք նաև երբեմն միջամտում էին ընտրությունների գործընթացին կամ ակտիվորեն որոշում էին, թե ով պետք է մտնի ընտրատեղամաս», – ասվում է փաստաթղթում:

Զեկույցում խոսվում է նաև հետընտրական գործընթացների մասին: Մասնավորապես, նշվում է, որ նախնական արդյունքների հրապարակումից անմիջապես հետո ութ ընդդիմադիր կուսակցություններ անվստահություն հայտնեցին ընտրությունների արդյունքների նկատմամբ:

«Ընտրությունների նախնական արդյունքների հրապարակումից կարճ ժամանակ անց ութ ընդդիմադիր կուսակցություններ, որոնք անցան անցողիկ շեմը, մերժեցին ընտրությունների արդյունքները և հայտարարեցին համատարած ընտրակեղծիքների մասին: Նշված կուսակցությունները բոյկոտեցին ընտրությունների երկրորդ փուլը և սպառնացին չմասնակցել նոր խորհրդարանի աշխատանքներին՝ միևնույն ժամանակ պահանջելով նոր ընտրություններ ԿԸՀ նոր ղեկավարության ներքո:

Ընտրություններից մեկ շաբաթ անց տեղի ունեցան մի շարք բողոքի ցույցեր, այդ թվում, ԿԸՀ գրասենյակի դիմաց: Հանձնաժողովներում և դատարաններում բողոքարկման գործընթացը ավարտելուց և բոլոր ընտրատարածքներում բողոքարկումների մերժումից հետո ԿԸՀ-ն նոյեմբերի 13-ին հայտարարեց ընտրությունների առաջին փուլի վերջնական արդյունքները:

Նոյեմբերի 21-ին 17 ընտրատարածքներում անցկացվեց մեծամասնական ընտրությունների երկրորդ փուլը», – ասված է ԵԱՀԿ / ԺՀՄԻԳ վերջնական զեկույցում: