Խորհրդարանը 80 ձայնով առաջին ընթերցմամբ արագացված կարգով ընդունեց «Մաքսային օրենսգրքի» փոփոխությունը, որը վերաբերում է թմրամիջոցների և այլ արգելված նյութերի անօրինական տեղափոխումը կանխելու մեխանիզմներին։

Ինչպես նշել է զեկուցող, Ներքին գործերի փոխնախարար Ալեքսանդրե Դարախվելիձեն, փոփոխությունը նախատեսում է սահմանային անցակետերում, նավահանգիստներում և օդանավակայաններում, ինչպես նաև փոստային առաքանիների համար նախատեսված կետերում Կենտրոնական քրեական ոստիկանության և մաքսային վարչության ներկայացուցիչներից կազմված համատեղ խմբերի ստեղծում։

Նրա խոսքով՝ վերոնշյալ խմբերի հիմնական նպատակը կլինի երկիր մտնող և դուրս եկող բեռների վերահսկողությունը և բոլոր կասկածելի իրերի կամ բեռների ստուգումը։

«Բացի այդ, կստեղծվի միասնական կենտրոնացված համակարգ, որտեղ կասկածելի բեռները նախնական ստուգման կենթարկվեն փաստաթղթերի հիման վրա։ Օրենքում կատարված փոփոխությունների նպատակն է ստեղծել արդյունավետ բեռների վերահսկողության համակարգ, որպեսզի Վրաստանը չօգտագործվի որպես թմրանյութերի և այլ անօրինական ապրանքների տարանցիկ գոտի», – նշել է Ալեքսանդրե Դարախվելիձեն։

Օրենքի նախագիծը նաև նախատեսում է տրանսպորտային միջոցների հետ կապված որոշակի ծառայությունների վճարների բարձրացում։ Փոփոխությունները վերաբերում են միայն այն դեպքերին, երբ տրանսպորտային միջոցը ժամանակավորապես ներմուծվում է Վրաստան կամ արտահանվում/վերաարտահանվում է երկրից: Տարանցիկ համարանիշների տրամադրման, փորձաքննության և համապատասխան մաքսային ու վարչական փաստաթղթերի պատրաստման վճարները բարձրանում են։

Օրենքի նախագծի նախաձեռնողը Վրաստանի կառավարությունն է, իսկ հեղինակը՝ Ներքին գործերի նախարարությունը։