Խորհրդարանի նախագահը հանդիպել է օկուպացիոն գծին հարակից գյուղերի բնակիչների հետ
Խորհրդարանի նախագահ Շալվա Պապուաշվիլին իր գործընկերների հետ հանդիպել է օկուպացիոն գծին հարող գյուղերում ապրող բնակիչներին։ Այս մասին «Ֆեյսբուք»-ով տեղեկություն է տարածում խորհրդարանի նախագահը։
«Մեր գործընկերների հետ հանդիպեցինք օկուպացիոն գծին մոտ գտնվող գյուղերի բնակիչներին։ Տեղում ծանոթացանք ստեղծված իրավիճակին և նրանց կարիքներին, լսեցինք նաև երախտագիտություն, խոսեցինք խնդիրների մասին։
Ծանոթացանք իրականացված և նախատեսվող ենթակառուցվածքային ծրագրերին։ Ուսումնասիրեցինք արդեն ավարտված խմելու և ոռոգման ջրի համակարգերը, պետական ծրագրի շրջանակներում տնկված պտղատու այգիները։
10-ամյա Նիկոլոզիին հանդիպեցինք Արբո գյուղում։ Նա հոր հետ միասին օկուպացիոն գծի մոտ տնկել է իր փոքրիկ այգին, որտեղ նույնիսկ մեզ հյուրընկալեցին։
Աձվիի դպրոց այցելելիս ջերմ հանդիպում ունեցանք դպրոցի ուսուցիչների հետ։
Օրվա վերջում Գորիում հանդիպեցինք ԵՄ դիտորդական առաքելության ղեկավարին և տարածաշրջանային գրասենյակի ներկայացուցչին, որտեղ խոսեցինք տարածաշրջանում առաքելության կարևոր դերի մասին։
«Օրն ավարտվեց լավ լուրով. ազատ են արձակվել Զազա Մեգրելիշվիլին և Թամազ Գոգիչաշվիլին, ովքեր ապօրինի ձերբակալվել էին ռուսական օկուպացիոն ուժերի կողմից օկուպացված Լոպանի գյուղի մոտ»,- նշում է Շալվա Պապուաշվիլին։